Tecnologia a bira for di algun añanan caba un piesa indispensabel den e dia pa dia di e hendenan, mayoria di e poblacion ta usa dispositivonan electronico pa trabou, estudio, entretenimento y specialmente pa relaciona cu otronan.
Actualmente, mayoria di hobennan entre 11 pa 18 aña tin un telefon cu acceso na internet, interaccion ‘online’ ta hopi importante pa esnan cu ta interactua y ta relaciona cu otronan a traves di nan profile di rednan social.
Ultimo datonan di Unicef ta indica cu 98.5% di hobennan tin por lo menos un profile den algun red social. Mientras cu 83.% tin tres profile of mas, asina mes, dos di cada tres tin mas cu un profile cu nan ta usa selectivamente cu famia of amigonan.
E tipo di rednan social aki for di algun añanan a incorpora e opcion di edita potretnan y videonan cu ta wordo subi na e red. Un filter a bira viral pa aumenta e caracteristicanan fisico “atractivo” y pa disminui loke socialmente ta wordo considera como “poco atractivo.”
Ta denomina “filter di rednan social” un conhunto di elementonan cu ta conforma un contenido di realidad aumenta cu ta permiti integra e virtualidad den mundo real.
E uso di e patronchinan digital aki ta wordo aplica na potretnan pa “pone mas bunita” e cara of e curpa. Sinembargo, profesionalnan di salud mental ta adverti cu frecuenta e modalidad aki por hiba e personanan pa haya un obsesion cu “perfeccion” y asina modifica e aspecto fisico.
Riba Instagram por ehemplo, tin filternan cu por wordo coloca den potretnan of ‘reels’ ora e usuario ta desea di subi un historia.
Di su parti, e red social TikTok ta sirbi pa edita videonan cu ta desea di publica riba e usuario su cuenta, tambe ta genera efectonan di zonido, cambio di color, entre otro.
Di acuerdo cu un estudio di e plataforma web pa gestiona rednan social ‘Hootsuite’, ta existi 500 miyon cuenta di Instagram rond di mundo; 75% di nan ta inclui filternan cu ta modifica digitalmente e realidad.
Psicologonan clinico ta señala cu “e filternan por wordo usa como wega, pa haci leuk. E problema ta cu e personanan ta depende di nan, cu nan tin mester di e filter pa presenta nan mes na otronan. Ta un falta di confiansa y di autoestima.”
Tambe ta menciona cu nan uso por resulta dañino specialmente pa e hobennan cu constantemente ta wordo exponi na tipo di beyesa cu no ta real, loke ta caba generando frustracion, insatisfaccion pa su mesun imagen y incluso depresion cu un impacto directo den autoestima.
Por compronde pa autoestima e conhunto di sentimentonan y pensamento cu cada persona tin riba su mes, kiermen na base di kico e ta pensa di su mes, kico e ta sinti y kico ta su balor compara cu otronan.
Den sentido aki, e balor cu ta otorga na su mes tambe ta wordo influencia pa loke otro hende ta sinti y ta pensa di dje, specialmente criticanan den etapa di adolescencia ta duna un peso grandi ya cu esey tin hopi importancia pa hobennan.
E expectativanan poco realista cu rednan social ta impone por genera un baho autoestima y persigui un ideal di perfeccion cu por genera ansiedad y sintomanan di depresion. Estudionan reciente a mustra cu e trastorno aki a aumenta casi na 70% entre hobennan y cu nuebe di cada dies no ta sinti nan mes satisfecho cu nan mesun imagen corporal.
Den sentido aki, uso di filternan pa altera e mesun imagen na rednan social ta contribui directamente den e generacion di expectativanan poco realista di imagen.
Un estudio realisa pa Universidad di California na 2020 a identifica cu ta existi un relacion entre uso di filternan na rednan social y alteracion di e forma di percibi e beyesa y e mesun curpa. Ademas, e resultadonan di esaki a indica e consecuencia di aumento di dismorfia corporal, un trastorno obsesivo den e cual e persona ta presenta un preocupacion exagera pa un of mas defecto of imperfeccion fisico cu otro personanan no ta ripara mes of fisicamente no ta mucho notabel.
Ora personanan ta topa cu un realidad cu ta resulta perhudicial pa e hobennan, prome cos cu mester pensa ta: kico por haci? E prome paso ta pa tuma consciencia di e problema, haya sa e realidad y sa kico ta pasando.
Pa e motibo ey, ta importante pa mayornan papia cu nan yiu tocante e aspectonan positivo y negativo di e rednan social y di e filternan, con esey por causa impacto den dje, puntra tocante su actividadnan riba rednan social di kico ta haci, ki contenido ta subi y kico ta wak.
Ta importante pa no husga, pa e hoben por sinti comprension y cu e ta wordo acompaña den proceso aki, kico e ta sinti ora e ta subi un potret riba rednan social y no tin hopi ‘like’ compara cu ora un potret tin filter y ta ricibi mas aceptacion.
Tambe por splica e consecuencianan cu por tin y importancia cu no mester dun’e na expectativanan ireal of di perfeccion y yud’e pa por haci actividadnan den su tempo liber cu lo genera satisfaccion y lo permiti tin mas interaccion afo di rednan social.
