SMAC a anuncia su prome fundraising pa tur carnavalista y calendario pa Carnaval 70

Ayera mediante un conferencia di prensa, presidente di SMAC, Darren van Ommeren a anuncia un fundraising cu nan ta bay haci conhuntamente cu Bingo Aruba pa tur carnavalista, musiconan, gruponan, reinanan, entre otro.

Esaki ta prome biaha cu e tipo di actividad aki ta ser haci lo cual ta un concepto diferente segun Van Ommeren a sigura, pa asina SMAC y Bingo Aruba por duna e oportunidad na tur persona cu ta participa of envolvi den loke ta trata carnaval pa nan por haya fondonan y por cubri nan participacion of gastonan den loke lo bira Carnaval 70.

“Nos sa cu e temporada ta un tiki dificil pa nos tur y esey ta haci cu e idea aki a bin riba mesa pa logra pa tur hende por yuda nan mes den caso aki y tambe yuda nos pa por haci Carnaval 70 hopi mas grandi di loke ya nos ta premira cu ta bay ta,” el a sigura.

Den e caso na sede di SMAC tur e ticketnan ta bay ta obtenibel, cualkier persona carnavalista por ta un bendedo y por acerca na nan pa nan por bira un punto di benta riba nan mes pa por bende bingo aki.

Un bes cu e persona ta bay bende e ticketnan, e persona aki ta bay ricibi un comision di 15 florin “e participante aki por bende pa por cubri su participacion den e paradanan di carnaval di Aruba, esaki tambe por yuda e reinanan tambe pa por cubri un parti di nan gastonan, igualmente e gruponan y musiconan,” Van Ommeren a informa.

E bingo ta bay tin mas cu 50.000 florin den premionan, e cuatro prome premio lo tin un balor di 2.500 florin cada un, e di dos tanda di cuatro wega tin 5.000 florin di premio pa cada wega y e dos ultimo wega ta bay tin 10.000 florin di premio.

Den total ta 10 wega cu ta bay ser hunga diadomingo 11 di juni, 5or di atardi na unda cu for di ayera a cuminsa e benta di e ticketnan.

Di su parti, Bingo Aruba a señala cu e intencion ta pa yuda SMAC sigui crece y pa nan sigui haya mas sponsornan pa Carnaval 70 por bira mas grandi y mas solido.

Pa loke ta trata e calendario pa Aruba su Carnaval 70, nan a informa cu e lo cuminsa dia 10 di november cu un Gala SMAC Event, di esaki van Ommeren a sigura cu den proximo dianan comunidad ta bay conoce e diseño cu ta bay ser comparti den tur medionan di comunicacion local.