Lo busca opcionnan pa refinancia Aruba su debe externo
E siman aki Minister di Finanzas, Xiomara Maduro ta atende e ‘IMF spring meetings’ cu tur aña ta organisa pa e Fondo Monetario Internacional na Washington DC.
Durante e siman aki, e mandatario lo topa cu ehecutivonan di IMF, representante di Reino Hulandes na IMF y tambe cu ehecutivonan di Banco Mundial. Minister Maduro lo hasi uso di e oportunidad tambe pa reuni cu algun banco comercial pa asina por explora e posibilidad pa por refinancia e debe di Aruba, specialmente e debe acumula cu Hulanda pa por a surpasa e pandemia, segun un comunicado di gobierno.
Sondea posibilidad pa refinancia Aruba su debe
Durante e biahe aki, Maduro lo sondea e posibilidadnan cu tin pa por refinancia e debe internacional di nos Pais. Aruba semper a presta placa riba e mercado internacional y debi na e pandemia a acumula un debe cu Hulanda tambe. Awo cu e pandemia a pasa y Aruba ta recuperando, ta yega momento cu mester cuminsa paga e debe haci cu Hulanda, cu ta madura na october proximo.
A cuminsa reuni caba cu Hulanda pa por sa bao ki condicion nan lo refinancia e debe di e pandemia. Hulanda a indica di ta dispuesto pa refinancia e debe di pandemia di Aruba bao condicion comercial, pues interes di mercado aumenta cu un margen di ganashi. Mirando cu Hulanda no ta bay duna Aruba y ningun otro Pais ‘kwijtschelding ‘ y cu tampoco lo refinancia e debe na interes preferencial di 0%, ta bon pa explora ki otro posibilidad tin pa refinancia Aruba su debenan, segun e comunicado.
Minister Maduro lo acerca instancianan manera, entre otro, IMF y Banco Mundial, pa explora kico nan lo por ofrece Aruba na fondonan special pa recuperacion despues di covid. E mandatario lo reuni tambe cu algun banco comercial pa asina mira ki opcion tin pa Aruba riba e mercado internacional di capital. Di e manera aki nos por tin un miho bista di kico tur ta e opcionnan pa por refinancia e debe di nos Pais, segun e comunicado ta finalisa.
