(AP) — Organisacion di Nacionnan Uni a bisa ayera cu ta evaluando su presencia na Afghanistan despues cu Taliban a prohibi hendenan muhe di traha pa e organisacion mundial – un sugerencia cu ONU por move pa suspende su mision y operacion na e pais.
Siman pasa, gobernantenan Taliban di Afghanistan a bay mas leu den e medidanan restrictivo cu nan a impone riba hende muhe, y a bisa cu muhenan Afghano emplea cu e mision di ONU no por sigui presenta na trabao. Nan no a duna mas comentario riba e prohibicion.
ONU a bisa cu no por acepta e decision, yamando esaki un violacion sin paralel di derechonan di hende muhe. Tabata lo mas recien den un cantidad di restriccion cu Taliban a impone desde cu nan a tuma poder na Afghanistan na augustus 2021, mientras trupanan di Merca y NATO tabata retirando for di e pais despues di 20 aña di guera.
E 3,300 Afghano emplea pa ONU – 2,700 homber y 600 muhe – a keda cas desde diaranson siman pasa pero ta continua trahando y ta bay ricibi pago, vocero di ONU, Stephane Dujarric a bisa. E 600 miembro di personal internacional, incluyendo 200 muhe, no ta afecta pa e prohibicion di Taliban.
ONU a describi e medida como un extension di e restriccionnan ya inaceptable di Taliban cu deliberadamente ta discrimina contra hende muhe y socava e habilidad di Afghanonan pa haya acceso na asistencia y servicio pa sostene y salba bida.
