(EFE) – Presidente di Colombia, Gustavo Petro diadomingo ultimo a manifesta cu ta dispuesto di reuni cu ex-hefenan di e grupo paramilitar Autodefensa Unida de Colombia (AUC), cu a manda un carta na fin di maart pidiendo un audiencia pa papia tocante e ley cu a permiti nan desmobilisacion.
“Hefenan paramilitar antiguo cu a pasa nan condena tambe ta bisa publicamente cu nan ta dispuesto di reuni cu mi. Mi ta kere cu e reunion lo por tuma luga,” Petro a bisa durante un acto di conmemoracion di Dia Nacional di Memoria y Solidaridad cu e Victimanan.
AUC a desmobilisa na 2006 despues di un proceso di negociacion cu Gobierno di e presidente e momento ey, Alvaro Uribe.
Como parti di acuerdo, ex-paramilitarnan a somete nan mes na Ley di Husticia y Paz, cu tabata contempla castigo di ocho aña maximo di prison a cambio di colaboracion pa aclaria crimennan, pero algun di e lidernan a perde e beneficio ey.
Den sentido aki, Petro a sigura cu e ta wak necesario pa Gobierno y paramilitarnan beneficia cu e ley ey “lo por reuni pa establece cu blanco y preto kico a pasa cu e propiedadnan, evalua kico a pasa cu e ley, den ki medida e proceso di paz a stop of si por culmina.”
Dia 22 di maart ultimo Petro a critica e Ley di Husticia y Paz pa motibo cu e ta considera cu no a repara e victimanan y cu e agresornan mester conta e berdad na e pais.
Shete dia despues, un grupo di 16 ex-hefe paramilitar, entre nan Salvatore Mancuso, ex-comandante di AUC, a pidi un audiencia cu Gobierno pa “expone cu detaye kico tabata nan aporte hudicial y extra-hudicial na paz y reconciliacion di Colombia.”
