Reglamento pa cooperacion den Areglo Comun ta duna programacion estricto di trabao

E Reglamento cu ta pertenece na e Areglo Comun a bin como anexo na esaki, den tres version, un pa cada pais Caribense den Reino.

E reglamento ta duna un programacion completo pa e manera con e cooperacion mester tuma lugar, cu ta abarca planificacion, coordinacion entre e organizacion ehecutivo (Uitvoeringsorganisatie) di Aruba – den e caso aki – y e Organizacion Temporal Hulandes (Tijdelijke Werkorganisatie), y entre e organizacionnan y e ministronan envolvi (ministro di Asunto Interno y Relacion di Reino y ministro di Aruba encarga cu Asunto General).

Tambe ta regla e forma con ta delibera y consulta entre e organizacionnan, con ta yega na decision pa bay ehecuta plan, e forma y formato di raporta tocante e trabaonan en curso, incluyendo e ‘time line’ estricto acorda pa cada fase di e proceso. Tambe tin e procesonan acorda con pa actua den caso cu e dos bandanan no ta yega na acuerdo tocante algun elemento di e proceso di ehecucion, loke lo hiba na mediacion manera defini den e Areglo mes.

Tambe e Reglamento ta contempla con y na ki momento publicacion tocante e avance den e cooperacion ta tuma lugar. E grado di exactitud y cautela cu ta tuma na cuenta hasta ta dicta cu den caso di publicacion di e version original Hulandes ta usa solamente e ehemplar firma pa e mandatarionan responsable. Esaki ta parce tambe un seguridad contra circulacion di version no aproba.

Frecuencia di planificacion

Cada aña ta delibera pa planifica e ‘Uitvoeringsagenda’ y ta dicidi si ta stipula mas agenda, mas cu e dos biaha pa aña standard y ta acorda e planificacion pa keda cla cu e uitvoeringsagendanan pa e aña. E planificacion ta keda acorda pa mas tarda e promer diarazon di october, a menos cu e ministronan envolvi ta acorda diferente. Cualkier adaptacion ta requeri un aprobacion di e dos ministronan. E periodo regular pa e uitvoeringsagenda, den caso cu tin dos, ta di 1 di januari te cu 30 di juni y di 1 di juli te cu 31 di december. Dem articulo 4.5 di e Reglamento ta duna e programa completo pa e uitvoeringsagenda, desde incio te na su entrega y aprobacion y entrada na vigor. Aprobacion ta tuma lugar pa mas tarda un siman promer cu e drenta na vigor. Despues di aprobacion ta pone e parlamentonan respectivo na altura di contenido di e agenda, a traves di e ministronan envolvi.

Plan van aanpak

E Uitvoeringsorganisatie di Aruba y e Tijdelijke Werrkorganisatie Hulandes por dicidi cu nan ta traha un plan di ehecucion (plan van aanpak). Gobierno di Aruba ta responsable pa e plan, eventualmente cu apoyo di e Uitvoeringsorganisatie y TWO. Tambe por haci uso di asesor o experto cu nan considera necesario. Ta haci uso di un formato fiho, y tambe tin termino fiho pa keda cla cu e plan. Por ehemplo: tin un periodo stipula di 10 dia pa e ultimo control pa e Uitvoeringsorganisatie di Aruba y TWO keda cla cu e ultimo check riba e concepto di e plan, cu no ta inclui e dianan extra necesario, si acaso mester haci adaptacion na e plan. Aprobacion di e plan ta sucede a traves di e ministro encarga cu Asunto General o e ‘vakminister’ envolvi. Despues e plan firma ta bay pa TWO y e secretario di estado ta firma e plan tambe, dentro di un siman (5 dia di trabao) y ta manda e plan firma pa e Uitvoeringsorganisatie Aruba. Cada plan van aanpak lo haya un ‘managementsamenvatting’ (management summary) cu despues di aprobacion di e plan lo keda publica. Esaki lo sucede normalmente dentro di un siman (5 dia di trabao) despues di aprobacion pa Aruba y Hulanda via e canalnan digital di escogencia.

Den un siguiente edicion lo trata e reglanan pa reportahe (Uitvoeringsrapportage), e parti financiero (di gasto y proyecto), y e parti di comunicacion, incluyendo con ta anda cu transparencia y cu confidencialidad den e proceso.