Diaranson 29 di maart 2023, Aruba Trade and Instustry Association (ATIA) a tene su reunion general di miembresia den e “New ATIA Building” unda a debuta oficialmente e sala di conferencia y façade nobo nobo.
Prome cu e parti oficial, Sr. Herrick Henriquez, Director di ATIA, a duna un presentacion interesante riba e tema di “Strategia di ATIA” pa 2023 y futuro. Sr. Henriquez a presenta en breve e 4 pilarnan pa ATIA sigui den un rumbo exitoso.
Durante e reunion a presenta e resultadonan di e aña anterior y e enfoke pa 2023 y alabes a eligi e miembronan di e hunta di directiva pa aña 2023 – 2024.
Durante 2022, ATIA su enfoke tawata riba recuperacion di Aruba su ecomonia y a participa den varios stakeholders meetings pa cu “landspakket” ribe e temanan di reforma fiscal, ley laboral, y clima di inversion den nos economia (“red tape”).
Tambe ATIA a sigi enfoka durante e aña riba desaroyo di e habilidadnan y expertisio di su miembronan y nan empleadonan por medio di diferente workshops, sesionan di informacion y eventonan pa engrandese e netwerk di miembronan di ATIA. Workshops nan exitoso tawata “Start-up week”, “Continued Financial Excellence Program, “Lunch and Learn – digital payments” y “People Management Seminar – Mental Health in the workplace”. No por a lubida e Business Mixers cu tawata hopi bishita, pero tambe e eventonan di “Year of Purpose” cu tawata: LIDERA “Purpose as Power”, “Youth Athlete Event” y tambe ATIA su Corporate Event anual.
Pa aña 2023 – 2024, e hunta di directiva a despidi di 2 miembro cu a forma parti di e hunta pa hopi aña, esta sr. Ronald v. Trigt y Sr. Tristan Every. ATIA ta gradisi Ronnie y Tristan pa tur nan añanan di aporte valioso como miembro di hunta di ATIA. E presidente, vice-presidente, tesorero y secretaria nobonan, lo wordo eligi durante e prome reunion di e hunta durante e luna di april y ATIA lo anuncia esei ora nan a wordo elegi.
E hunta di directiva di ATIA pa 2023 – 2024 ta consisti di: Sr. Frank Snijders, Sra. Gina Habibe, Sr. Tito de Cuba, Sra. Tisa LaSorte, Sr. Roland Croes, Sr. Mattijs Bijen, y Sr. Andrew Harms. ATIA ta contento pa anuncia su 2 miembro nobo nan cu ta Sra. Jennifer Figaroa-Guzman y Sr. Danilo Werleman.
E reunion a culmina cu un networking event pa e miembronan presente unda ATIA a debuta su “Bao Palo Terrace”.
