(AP) – Colombia ta bay cuminsa un evacuacion preventivo di e comunidadnan cu ta biba den e parti halto y rond di e volcan Nevado del Ruiz despues di aumento di su actividad sismico, un indicador cu lo por produci un erupcion den proximo dianan.
Maximo autoridad estatal di departamento di Caldas, gobernador Luis Carlos Velasquez Cardona, ayera dialuna a bisa cu “nos ta bay procede for di e momentonan aki, cu liderazgo di alcaldia municipal, pa evacua 40 famia. Esaki ta un evacuacion preventivo.”
Dia 30 di maart autoridadnan a eleva e nivel di alerta geel pa oraño. Di su parti, Servicio Geologico Colombiano a informa cu diadomingo ultimo 2 di april a registra 5.400 temblor.
Alerta geel ta un categoria cu ta contempla cambionan den comportacion di e volcan cu emision di shinishi, temblornan, zonido y holo di gas volcanico. Oraño ta indica cu probablemente lo tin un erupcion den proximo dianan mientras cu cora ta ora erupcion ta cerca of ta den curso.
Tambe a adopta otro medidanan como prohibicion di acceso di personanan na Parke Natural Nevado del Ruiz y a ordena scolnan pa adelanta accionnan pa cu muchanan por haya les virtual for di dialuna 10 di april despues cu Semana Santa ta caba.
E mandatario Gustavo Petro riba su cuenta di Twitter a pidi “disciplina” den evacuacion. Ayera dialuna e presidente a adelanta un conseho di siguridad pa asina analisa otro medidanan cu lo permiti disminui riesgo.
E volcan ta ubica na 5.321 meter riba nivel di lama na cordiyera central di e pais y ta na e limite entre e departamentonan di Tolima y Caldas.
E actividad di e volcan ta wordo monitoria di forma permanente y prioritario for di 1985, aña den cual un erupcion a causa e morto di casi 25.000 persona na departamento di Tolima.
