Asina a informa minister di Asuntonan Economico, Comunicacion y Desaroyo Sotenible, Geoffrey Wever ayera den oranan di atardi, despues cu tabatin cierto discusion tocante e topico aki. ELMAR N.V tambe a reacciona riba esaki diahuebs den oranan di anochi.

Minister Wever a declara cu ayera nan a ricibi un carta di ELMAR unda ta duna un propuesta pa rebaha di tarifa di coriente y tambe nan a haya un splicacion di dje.

“Awo nos expertonan ta revisando e propuesta pa asina nos por tuma un decision responsabel y husto pa cu e tarifa nobo, e siman ta cerando, pero e trabao importante ta sigui. Pa otro siman tin mas claridad riba e topico aki,”minister Wever a indica.

Den un comunicado pa prensa di dia 29 di maart, minister Wever hunto cu minister di Energia, Glenbert Croes a splica cu den luna di juli di aña pasa, WEB y ELMAR a informa Gobierno di Aruba cu como consecuencia di e aumento di prijs di petroleo riba mercado internacional, mester aumenta e prijs di awa y coriente mester.

Segun Gobierno di Aruba a sigura, nan verifica tur calculo y cifra financiero y a duna un aprobacion di 6 luna pa aumenta e prijs di coriente, bao di condicion cu dia 1 februari 2023 mester reevalua esaki. Pues e aumento ta valido te cu 1 februari 2023. E aumento aki tabata necesario pa garantisa e suministro di awa y coriente na Aruba.

“Mirando cu no tin un aprobacion di Gobierno di Aruba pa un ahuste di e prijs di coriente pa e periodo despues di 1 februari 2023, e facturanan cu ELMAR a emiti over e luna di februari 2023 ta den violacion di e concessievoorwaarden y nos a informa ELMAR na varios ocasion di esaki a traves di varios carta cu mi a manda ELMAR den nomber di mi mes como e minister encarga cu tarifa segun e concesion y tambe den nomber di colega minister Glenbert Croes cu ta encarga cu energia di Aruba”, segun minister Wever.

Dia 28 di maart e ministernan a manda carta na Elmar pa informa cu nan tabatin te cu diabierna 31 di maart, 2023 – 12:00pm pa presenta un propuesta financiero pa por establece e prijs di coriente desde 1 februari. “Prijs di coriente ta halto y ta afecta e costo di bida di tur ciudadano. Banda di esaki e ta un peso grandi pa gastonan operacional di empresanan cu ta conduci inflacion directamente. Pa es motibo e no por ta asina cu un tarifa ta wordo cobra cu no a wordo aproba door di Gobierno di Aruba,” e documento a indica.

Di su parti, ELMAR den un comunicado a señala cu nan a publica un video riba nan rednan social pa duna informacion tocante e relacion entre ELMAR y WEB Aruba N.V. Den esaki nan a expresa cu “ELMAR ta cumpra electricidad for di WEB. Pa por baha tarifa di coriente, WEB mester baha nan tarifa di benta di electricidad na ELMAR. Esaki ta importante pa tur cliente di ELMAR por compronde e relacion entre e dos companianan aki. Un otro dato a wordo presenta den e video ta e hecho cu 80% di benta di coriente ta wordo usa pa paga WEB. Ademas, lo tin informacion tocante e ganashinan cu ELMAR ta ricibi, y kico nos ta haci cu e ganashi aki pa cubri e trabaonan di mantencion y proyectonan di expansion riba e grid di coriente. Finalmente, e video lo trata tambe e responsabilidad riba e fianzanan di e companianan di utilidad na Aruba, esaki lo ta e topico final cu lo wordo trata den e video informativo aki”.