Relaciona cu e proyecto Aruba Hydrogen Valley, Minister di Energia, Glenbert Croes e biaha aki ta na Spaña pa bishita e planta di hidrogeno “Power to Green Hydrogen Mallorca”. Den un publicacion ariba Facebook di Gabinete Wever-Croes II, Minister Croes a duna un splicacion di su bishita na e planta aki y con esaki lo yuda den e plannan pa e proyecto aki.
Segun Minister Croes a indica, e planta di Mallorca ta manera un refineria di hidrogeno pero den un tamaño mas chikito, pero pa Aruba, e minister a indica cu mirando e necesidad y consumo, e planta lo ta un averahe di 5 biaha mas grandi. “Pa Aruba como lider di e proyecto aki den e region Caribense, lo ta importante pa e suministro di hidrogeno no solamente tin su impacto riba e economia y comunidad di pais Aruba sino tambe riba e region.”
E obhetivo di e bishita na e planta aki tabata pa por mira y reuni cu e stakeholders, gobierno y institutonan cu ta trahando riba e proyecto aki, pa nan yuda, guia y asisti Aruba den e proyecto “Aruba Hydrogen Valley”.
Manera ya caba a keda anuncia, e zona di refineria di Aruba lo wordo transforma den un “hydrogen valley” na unda tambe lo tin otro proyectonan di energia renobabel y sostenibel cu ta fundamental pa medio ambiente y pueblo di Aruba.
For di analisis di Bon Dia Aruba por conclui cu produccion di hidrogeno na Aruba lo ta primeramente orienta riba uso den produccion di energia electrico pa e red di WEB/Elmar. Esaki ta implica cu lo usa hidrogeno como backup, y no pa produccion regular di electricidad, cu awor ta via HFO y manera planifica via gas natural, pasobra e produccion di hidrogeno ta tuma un bon cantidad di electricidad (renovable) pa produci.
Lo mester di hopi mas energia limpi pa por produci tanto hidrogeno y energia pa uso directo den e red di distribucion, si e proposito ta pa yega na mayoritariamente energia renovable den e proximo decadanan. Cu un contrato traha pa e proximo 20 aña pa uso mayoritario di gas natural pa energia, ta logico cu no lo logra un cambio pa produccion mayoritario di energia renovable.
Pa loke ta exportacion di hidrogeno, un area no explora, aunke tin iniciativa caba den nos region cu por ta di escala bastante grandi. Aki e aspecto di transporte maritimo, disponible o no, lo hunga un papel, banda di exportacion di hidrogeno pa otro uso cu no ta electricidad, manera diferente proceso kimico. Punto importante pa tuma na cuenta ta cu otro paisnan lo busca di ta autosuficiente, y no depende di inicio caba di importacion, por ehempel di Aruba. En general, tin demasiado factor desconoci pa por duna un imagen mas completo di kico por spera di factibilidad di un proyecto asina na Aruba.
