(AP) – E estado di Arkansas a demanda TikTok y Meta riba diamars, bisando cu e companianan di rednan social tabata mal informando e consumidornan tocante e siguridad di muchanan riba nan plataforma y e proteccion di e privacidad di e usuarionan.
E estado a entrega dos demanda contra Tiktok y e compania ByteDance y un tercer demanda contra di Meta, cual ta doño di Instagram, acusando e companianan di viola e acta Deceptive Trade Practices. “TikTok ta un peliger scondi,” un di e demandanan a acusa. “Siempre y cuando TikTok por sigui gaña y mal informa e consumidornan di Arkansas tocante e riesgonan na nan data, e consumidornan aki ta victima facil.”
Gobernador Sarah Huckabee Sanders y abogado general Tim Griffin, ambos republicano, a anuncia e demanda mientras TikTok ta sigui enfrenta critica tocante e siguridad di e data di su usuarionan. Ambos FBI y e oficialnan di Federal Communications Commission a adverti cu ByteDance por comparti data di usuario di TikTok cu China su gobierno autoritario.
Un di Sanders su prome movidanan tabata despues cu el a keda huramenta como Arkansas su gobernador den januari tabata di firma e orden ehecutivo pa prohibi TikTok riba tur dispositivo di e estado.
Un di e demandanan ta acusa cu TikTok no tabata tumando e pasonan apropia pa proteha e menornan kendenan ta usa e plataforma di contenido inapropia, incluyendo contenido sexual y material cu ta ilustra droga of uso di alcohol. TikTok no a responde inmediatamente na email cu peticion di comentario riba diamars. “Nos tin decadas ta mira con durante e decada un compania di rednan social tras di otro a explota nos muchanan pa ganashi y a scapa bista di gobierno,” Sanders a bisa den un declaracion publica pa su oficina. “Mi administracion no lo tolera e status quo fracasa aki.”
