(AP) — Ta un dia ordinario den e favela – of bario di menos recurso – di mas grandi di Brazil. Y pa prome biaha desde cu pobresa, falta di oportunidad y desigualdad economico a causa cu favelanan a aparece na hopi ciudad di e pais, e superlativo no ta pertenece na un favela na Rio de Janeiro.
Sol Nascente ta apenas 34km for di e capital Brasilia den Districto Federal, cual su GDP per capita ta hopi mas halto cu cualkier estado Brasileño, subrayando e desigualdad entre barionan di trahador publico afluente, y e afueranan di e districto.
E cantidad di hogar den Sol Nascente a aumenta 31% desde 2010 na mas di 32mil, surpasando e favela riba sero di Rio, Rocinha, cual tabata esun mas pobla na Brazil, segun datonan preliminar for di e censo andando. Rocinha tin casi 31mil hogar, e datonan ta mustra.
Riba e camindanan di tera di Sol Nascente cu casnan construi pa su habitantenan y paden di e tiendanan druk y restaurant na e caminda principal, niun hende cu ken AP a papia a celebra e rango nobo. “Ainda nos mester hopi cos, manera saneamento y infrastructura basico,” segun un bendedor riba caya, Francisca Celia, 43. El a agrega cu Sol Nascente no ta mesun desorganisa ni peligroso cu e favelanan cu el a mira tempo cu el a bishita Rio tres aña pasa. Ademas, e terenonan ta hopi mas grandi.
E crecemento di e poblacion di Sol Nascente ta refleha yegadanan nobo buscando pa tereno barata of desocupa pa construi hogar, unda na otro sitionan den Districto Federal hende di menos recurso hopi biaha ta paga huur relativamente caro. Tambe ta refleha e aumento di hende bibando den barionan di clase trahador na e pais, impulsa pa un crisis di vivienda generalisa causa pa recesion profundo y prijs mas halto pa huur, e efectonan di cual ta empeora pa e pandemia di Covid-19, segun Marcelo Neri, un economista y investigador social na e Fundacion Getulio argas, un universidad y think tank.
E cantidad di hende bibando den areanan cual instituto nacional di estadistica ta clasifica como “aglomeradonan subnormal” a aumenta cu 40% na 16 miyon persona desde e censo di 2010, segun datonan preliminar di e instituto, revisa pa AP. Poblacion di Brazil en su total a crece menos cu 9% den e periodo aki.
Aglomeradonan subnormal ta inclui no solamente favela, sino otro terminonan usa na Brazil pa describi areanan urbano cu ocupacion iregular y servicio publico deficiente. Residentenan di Sol Nascente ta reconoce cu antes e tabata un favela, pero a bsia AP cu hopi area di e comunidad a surpasa e termino aki.
E instituto di estadistica ta stop di considera comunidadnan aglomeradonan subnormal unabes cu mayoria di residente ta obtene un titulo legal pa nan propiedad of tur servicio esencial ta disponible, segun e coordinador di geografia di e instituto, Cayo Franco.
Favelas ta crece mientras hende ta move den tereno publico y priva desocupa, sea riba sero of tera plat, manera Sol Nascente. Sol Nascente ainda tin mal transporte publico y camindanan di tera dificil pa crusa, cu inundacion frecuente durante yobida di berano. Apenas algun residente a obtene titulo legal, y servicionan no ta accesible universalmente.
