Cu AVP ta den crisis ta mas cu obvio, bo lo bisa. Cu cada ken ta pa nan cuenta ta un hecho, bo lo conclui. Cu ta purba aki aya pa drecha cos, sin ningun clase di sincronisacion tambe ta remarcabel. Cu di paden ta cuestiona nan propio lider ta loke mas ta resalta, cual sigur ta pone bo cuestiona e asunto aki aun mas.
Nan mes ta papia di hala bieu y hala nobo, nan mes ta cuestionando e falta di liderazgo y comunicacion. Diripiente nan ta papia abiertamente di e problema “rond di Benny” riba lista, diripiente ta trece na duda e capacidad di Mike Eman pa maneha e partido y percura pa solucion di problemanan interno.
Cu Mike ta ausente no ta algo di awo
Pero awe mi kier pa nos pensa un rato si esaki no ta algo cu nan mes a orkestra of porfin nan a mira e realidad di e situacion di nan lider? No ta di awo e ta bisto cu AVP tin un lider ausente, un lider sin solucion, un lider cera den su penthouse na Marisol Building. Un lider cu constantemente ta den un elogio propio continuo ora leu a leu e dicidi di presenta, un lider cu a perde tur contacto cu realidad y ni kier reconoce cu un pandemia a pasa riba e pais aki (of miho bisa cu no ta cumbini’e papia di esaki).
Tras di cortina
Abo ta kere cu AVP ta realmente den crisis? Bo no lo pensa cu ta nan mes ta creando e scenario pa lanta partido chikito pa nan por ta para mas fuerte pa proximo eleccion? Pasobra loke ta tumando lugar publicamente ta manera premedita y nada usual pa un partido grandi y normalmente bon organisa manera AVP. Lo ta interesante pa bo keda atento cu no ta wega politico ta keda hunga na beneficio partidista y cu meta pa toch bin na poder. Pasobra ta con un partido sin liderazgo, sin comunicacion interno y cu a masacra e pais aki, a crea un megadebe y a deha di pone prioridad na asuntonan social di e pais aki por keda evalua pa maneha e pais aki un biaha mas? Para keto realisa, para keto evalua!
Ta mucho “facil” pa nos kere cu cosnan a bay y pasa manera nan a bay. Pueblo mester puntra nan mes con ta posibel cu un partido manera AVP no a reuni pa un reunion asina importante? Un reunion caminda tur miembro di Fraccion di AVP tabata presente pero no tur a hiba palabra. Pa simannan largo nan a sali cuestiona, ataca y instiga pueblo, anto ningun di e coleganan bieu incluyendo e lider di nan partido, Mike Eman, no por a tuma tempo pa informanan kico berdaderamente a pasa cu e caso Tofanelli? Den reunion e muchanan manda (e hala nobo) di e partido a bin pa “basha bala” den sala di parlamento y e bieunan tabata sa kico ta sosodiendo. Nan a laganan cuestiona MEP y Raiz y durante e reunion publico laga Mike de Meza bisanan e berdad y laga nan cara na berguensa. Pregunta ta: dicon a masacra nan mesun coleganan asina? Cu ki meta?
A trata e acuerdo y no exoneracion
Awe nan kier pa pueblo kerenan cu ta te dia di reunion De Meza a bin corda cu nan partido AVP a dicidi pa no sigui procede y no a bay den casacion, a base di consehonan huridico. Cu el a lubida cu pais Aruba a dicidi pa bay den negosacion pa yega na un “schikking” (i.e., acuerdo) cu Tofanelli mirando cu Pais Aruba (AVP) a perde e caso den Corte Comun. Ta e acuerdo aki ta locual berdaderamente nos a trata durante e ultimo reunion publico y no exoneracion di ex minister Edison Briesen manera nan kier pretende. Ultimo reunion nos a enpodera e Gobierno actual cu mester a termina e trabou di e gobierno di AVP pa por paga e suma di e acuerdo aki na Tofanelli. Suma cu nan a logra baha por cierto. Mirando cu no obstante e hecho cu nos no tabata atendiendo e parti di “vrijwaring” pero di e acuerdo, AVP su hala nobo y MAS ta di esaki so nan kier a papia. De Meza a hay’e ta informa su coleganan di oposicion cu otro noticia sorpresa durante e reunion publico, esta cu ta AVP mes a dicidi pa trek in e caso contra sr. Edison Briesen pasobra nan no tabatin interes den esaki y kier a stop e persecucion contra sr. Briesen. Pueblo boso no ta haya frapante e hecho cu ni Mike Eman, ni Mike de Meza, ni ningun di e otronan di e hala bieu di AVP cu a forma parti di conseho di minister e tempo ey por a informa nan coleganan di hala nobo? Crisis di comunicacion? Of strategia premedita?
Crisis di berdad of strategia?
Tres cos ta 100% berdad: 1) Tin un hala nobo den AVP, 2) nan no kier Mike Eman como nan lider y 3) e hala bieu tin cu hala kita. E ta bisto cu e ta incapaz di lidera y e hala nobo ta prefera Gerlien Croes na su lugar. E unico cu a sali publicamente vocifera su malcontento di e situacion y cu no ta tene miedo di e hala bieu ta Ryçond Santos do Nascimento. Manera cos ta bayendo na e momento nan aki, ta parce mi cu e ta e unico cu ta apto pa ta lider.
Enfoke y voice notenan circulando ta subrayando e realidad aki. Tambe ta keda enfatisa cu e hala nobo no kier e bieunan mas riba lista pasobra nan ta stroba nan crecemento. En todo caso nos por conclui cu e bieu y e nobonan ta midiendo forsa. Pregunta ta: esaki ta orkestra of di berdad AVP ta den crisis?
Mike Eman manera semper ta boca cera y a desaparece, Gerlien cero comentario riba e puntonan aki. Hecho ta cu Mike Eman a faya barbaramente, Gerlien a gaña y malinforma pueblo pretendiendo di sa e berdad, y Mike de Meza kier a hunga rol di esun cu ta papia berdad pero a laga e calumnia y instigamento tuma lugar trankil asina te dia di reunion. Pueblo, esaki ta crisis di berdad of ta strategia?
