Tur mucha, sin importa nan sexo, limitacion of herencia social cultural, tin derecho riba desaroyo, cuido y educacion. Riba e Dia Mundial di Down Syndrome, Departamento di Mucha y Hoben (DMH) kier comparti cu comunidad tocante un proyecto y vision, cu a inicia na augustus 2020 pa e Centronan di Cuido di Mucha na Aruba. Intervencion trempan ta un aspecto crucial y importante di diversificacion y inclusion y ta sumamente necesario pa desaroyo optimal y saludabel di nos muchanan. Esaki ta exigi tambe pa bin cu un accion di maneho hopi mas concreto, pa por realisa un structura di cuido duradero y sostenibel na bienestar general di nos muchanan dentro di centro di cuido di mucha.
Dato Intervencion Trempan
E cifranan for di Landelijke Kwaliteitsmonitor Kinderopvang (LKK) na Hulanda a indica cu alrededor di 24% di e muchanan dentro di ‘kinderdagopvang’ (traimerdia) y rond di 37% di e muchanan den centro di cuido di mucha (peuteropvang) tin un necesidad di cuido special, segun e trahadonan pedagogico. E gran mayoria di e grupo aki tin necesidad extra na sosten di idioma y tambe ta indica desafio den comportacion of tin cierto caracteristica di autismo (6%), limitacion fisico y cognitivo (2%). Pues tur e muchanan aki tin mester di atencion y cuido extra of adapta.
Na Aruba tambe nos ta acumulando dato actualmente den e centronan di cuido, pa asina DMH desaroya un sistema di cuido di intervencion trempan pa e muchanan di 0–4 aña den centro di cuido di mucha. Intervencion Trempan den Centro di Cuido di Mucha ta un mester y ta parti di derecho di mucha tambe, ya cu esaki ta brinda nos muchanan cu necesidad special e oportunidad husto y optimal pa ta identifica mas trempan y crea un plan di accion profesional, conhuntamente cu e involucracion di e mayornan y dicho centro di cuido di mucha, cu sosten profesional di coordinacion di Departamento di Mucha y Hoben (DMH).
Inicio Intervencion Trempan den centro di cuido di mucha
A base di e resultadonan di investigacion (Nulmeting in Kinderopvang van Aruba) di 2021 conhuntamente cu CBS, a tuma contacto cu 23 centro di cuido di mucha cu a indica cu nan tin necesidad pa haya sosten den guia profesional di e muchanan cu un necesidad special. Di e 23 centro di cuido cu a indica den e Nulmeting di ta tuma mucha cu necesidad special, 10 centro di cuido di mucha a brinda e espacio y oportunidad pa ta parti di e proyecto piloto. Den 2021 y 2022 a percura pa delinea un ‘pathway’ di Intervencion Trempan di DMH for di varios encuentro fructifero. Di e 8 centro di cuido di mucha, un total di 141 famia a haci peticion oficial na DMH pa yena e ‘Developmental Milestone Checklist’ ‘di ‘Centrals for Disease Control and Prevention” (CDC) di Merca, cu ta un instrumento di screening. Tambe a uza como instrumento di evaluacion ‘Developmental Assessment for Young Children – Second Edition”, (DAYC-2), di cual a resulta cu 66 caso ta uno di preocupacion concreto di necesidad special, ya cu nan ta score bou di e criteria di cumpli cu 80% di e aspectonan di desaroyo segun edad.
Status actual di Intervencion Trempan
E aña aki ta completamente dedica pa crea un ‘pathway’ social di sosten, guia y ayudo profesional p’e 30 muchanan di 1-4 aña, cu ta den e proyecto piloto. Desde januari te juli, lo traha cu e muchanan aki, conhuntamente cu e diferente stakeholders, cu ta forma parti di e concepto di sistema di Intervencion Trempan di DMH. Esaki ta un prome paso concreto di DMH pa brinda atencion na e muchanan cu necesidad special y asina crea un sistema di cuido y sosten profesional dentro di centro di cuido di mucha y lo brinda mas informacion na comunidad.
