Cuatro Mericano secuestra a drenta Mexico pa cumpra remedi

(AP) — Hombernan arma a secuestra cuatro ciudadano Mericano a crusa bay Mexico for di Texas siman pasa pa cumpra remedi, pero a keda pega den un tiramento cu a mata al menos un ciudadano Mexicano, segun oficialnan Mexicano y Mericano a bisa ayera.

E cuatro persona tabata den un minivan blanco cu plach’i number di North Carolina. Nan a cay den e tiramento diabierna tiki despues di drenta e ciudad di Matamoros for di Brownsville, e tip ma sur di Texas cerca di costa di Golfo, segun FBI a bisa den un declaracion diadomingo, agregando cu hombernan arma a tuma tur cuatro y hinca nan den un vehiculo bay cu nan. E Bureau ta ofreciendo un recompensa di $50mil pa regreso di e victimanan y aresto di e secuestradornan.

Presidente Mexicano, Andres Manuel Lopez Obrador a bisa ayera cu e cuatro persona tabata bayendo pa cumpra remedi, “tabatin un confrontacion entre gruponan y nan a keda deteni,” sin duna detaye.

Un muhe coriendo auto na Matamoros tabata testigo di loke a parce di ta e tiramento y secuestro den pleno luz di dia. El a pidi pa keda anonimo pa miedo pa represalia. E escena ta ilustra e teror cu a prevalece na Matamoros, un ciudad domina pa fraccionnan di cartel di Golfo cu hopi biaha ta bringa entre nan mes. Memey di e violencia, miles di Mexicano a desaparece den solamente estado Tamaulipa, unda Matamoros ta ubica.

E muhe a bisa cu el a mira otro auto dal e minivan blanco cerca di un interseccion, y despues tabatin tiramento. Otro SUV a yega y varios homber arma a sali. E muhe a drenta den shock, niun hende a haci zonido y niun hende a move. El a bisa cu e hombernan arma a forsa un muhe, cu por a cana, drenta patras den un pickup. A carga otro persona hinca den e truck pero e por a move su cabes. “E otro dos nan a lastra riba e caminda, nos no sa si nan tabata bibo of morto,” el a bisa. Autoridadnan Mexicano a yega despues.

Video riba rednan social diabierna ta mustra hombernan cu rifle y armadura hincando e cuatro persona patras den un pickup blanco. Un ta na bida y sinta, pero e otronan ta mustra sea morto of herido. Al menos un persona tabata parce di lanta su cabes for di caminda prome cu a hink’e den e truck.

Tiramento na Matamoros tabata asina malo diabierna cu consulado Mericano a duna alerta pa peliger. Autoridadnan local a adverti hende pa shelter inplace. No tabata inmediatamente cla con e secuestronan por ta conecta na e violencia.