Mediante un conferencia di prensa a anuncia e diferente actividad cu ta bay tuma luga den proximo dianan pa loke ta trata celebracion di Dia di Himno y Bandera, unda e aña aki tin cu lema pa e celebracion ‘Union ta e forsa di nos baranca tan stima.’

Di esaki, presidente di Comision Celebracion di Dianan Nacional (CCDN) Lyonel Dirksz a informa cu tin varios actividad cu ta cay directamente bao di e comision aki como Poeta di Patria cu ta bay tuma luga dia 15 di maart, manifestacion cultural dia 17 di maart, acto protocolar dia 18 di maart, eventonan cu tambe CCDN ta partner cune como Festival di Himno y Bandera den categoria infantil y hubenil cu ta bay tuma luga dia 10 y 11 di maart y despues e festival adulto cu ta bay ta 12 di maart riba Plasa Betico Croes.

Pa loke ta trata e manifestacion cultural Dirksz a señala cu esey ta bay cuminsa for di 6.30 di atardi na unda ta bay tin mas di 40 tent cu ta bay bende cuminda crioyo, cos dushi, artesania unda ta bay acompaña musicalmente pa diferente artistanan y gruponan durante e actividad cu tin planea di caba cerca di 10.30 di anochi.

Academia musical Harpa y Cuarta bao direccion di Edgar Kelkboom ta bay habri e programa aki na unda 8or di anochi e programa ta bay cuminsa na momento cu mandatarionan lo yega, Orkesta Cultural bao direccion di Cris Kross ta bay tin compania di varios artista di e comunidad y tambe e Rey di Tumba di carnaval 69 y Soca King 2023.

Pa 18 di maart e actividadnan ta cuminsa for di mainta trempan, unda e acto protocolar na Plasa Betico Croes ta bay tin logistica pa asina por celebra e Dia Nacional cu ta bay tin un coro di grupo di muchanan di scol di Santa Cruz cu a wordo scogi, den caso aki Colegio Laura Wernet Paskel, Colegio San Hose, Maria School y nan ta bay wordo acompaña pa coro Tutifruti, e banda hubenil cu tambe ta bay ta presente pa acompaña e muchanan ta Caribbean Combo y alumnonan di Scol di Musica Rufo Wever.

Na momento cu acto protocolar lo termina ta bay sigui e desfile di gruponan uniforma y despues comunidad por sali y disfruta di e dia cu ta bay tin hopi actividad rond di e isla manera ta custumber.

Dirksz a haci un invitacion na gruponan social, deportivo y centronan di bario cu lo tin actividadnan pa asina tuma contacto cu CCDN pa nan actividad por ta riba nan calendario di cultura prome cu dia 10 di maart na e siguiente e-mail: ccdn@cultura.aw

Junior Arends vice-presidente di CCDN a expresa cu e evento ‘Poeta di Patria’ ta bay tuma luga dia 15 di maart na Cas di Cultura, inscripcion a wordo habri caba na tur esnan cu ta interesa pa participa sea pa declama un poesia of un poema na honor di Aruba.

Comision Arte di Palabra y Fundacion Corector Papiamento ta e instancianan encarga pa loke ta trata e organisacion di e Poeta di Patria 2023. “Tur escritor, declamado ta wordo invita pa haci uso di e oportunidad aki pa inscribi y participa,” Arends a sigura y tambe a bisa cu te awe tin e oportunidad pa por inscribi y hasta 6 di maart tin oportunidad di manda e poema via digital.

E tema cu ta bay wordo usa pa esaki e aña aki ta “Aruba” na unda e participantenan ta bay enfoca riba tur lo cual ta identifica loke ta trata cultura di Aruba.

Di e exigencianan, Arends a bisa cu e poema mester tin di entre 4 pa 9 strofa y cada strofa mes mester contene 4 regel, e poema por rima, mester ta na papiamento y tin cu expresa un mensahe relaciona cu e tema Aruba su cultura. Cada poeta por participa cu un poema manera el a sigura y por manda informacion na artedipalabra@gmail.com

Den otro actividad, tambe ta bay tin concurso di pintura pa scolnan preparatorio y scolnan basico di e seis districto na unda cada scol ta bay ricibi den proximo dianan e informacion necesario pa muchanan por pinta usando nan fantasia y creatividad.

Pa esaki ta bay cuater categoria como scolnan preparatorio, scol basico klas 1 y 2, scolnan basico klas 3 y 4, scolnan basico klas 5 y 6. Jessica Croes encarga cu e Festival Un canto pa Aruba su Himno y Bandera a bisa cu e evento aki ta bay cuminsa diabierna 10 y diasabra 11 di maart cu categoria infantil y hubenil, dia 12 di maart ta bay caba cu categoria di adulto. Esaki ta bay ta e di 26 edicion di e festival e cual ta bay tuma luga na Plasa Betico Croes for di 6or di atardi na unda lo tin 13 agrupacion y 23 cantante, den categoria di adulto cu ta hopi gusta pa comunidad Croes a recorda na compositornan y areglistanan cu esaki ta un festival di compositor.

Exposicion Diaspora Arubiano na Archivo Nacional

Director di Archivo Nacional Aruba, Raymond Hernandez, a informa cu 18 di maart ta wordo celebra tur aña for di 2006 cu excepcion di e dos aña di pandemia di Covid-19, e actividadnan di Archivo semper ta bay combina cu un exposicion na unda nan ta trata di topiconan cu na e momento ey nan ta kere cu ta hopi interesante pa mustra na publico.

E aña aki nan ta bay enfoca riba e descendencia di e Arubiano, di na unda tur hende ta bini “p’esey e exposicion aki ta carga nomber di Diaspora Arubiano na unda nos lo cuminsa desde e momento cu prome bishitantenan cu a bira habitantenan cu a yega Aruba te mundo moderno di awendia na unda cu diferente nacionnan di mundo a bin y ta forma parti di nos pais,” el a bisa.

Tambe lo enfoca riba e parti di sclavitud for di 18 di maart te cu 1 di juli unda cu ta bay habri e aña di conmemoracion den Reino pa loke ta trata abolicion di sclavitud.

18 di maart nan ta bay mustra na comunidad diferente faceta con e hendenan a migra y a yega na Aruba, tambe con cierto momentonan hendenan a bandona Aruba.