(NLTimes)—Logius, cual ta un agencia gubermental cu ta maneha e sistema di DigiD pa algun websites, a bisa cu e lo sigui aumenta e capacidad diahuebs pa mas hende por haya acceso den nan sistema. Desde diaranson, hende por a sigui yena nan declaracion pa impuesto atrobe. E pura pa entrega informacion na e Departamento di Impuesto sa pega e sistema, cual ta causa cu hopi no por ‘log in’ cu nan DigiD.
Pa via di e problemanan cu DigiD, tambe ta a bira mas dificil pa log in den otro organisacionnan cu ta rekeri DigiD, manera seguro di salud y agencia di beneficio UWV. Logius a declara diaranson cu e ta mira mas pedida pa log in compara cu dia 1 di maart, pero ainda no sa pakico.
De hecho, e Departamento di Impuesto a ricibi casi 60.000 declaracion di impuesto caba den e prome shete ora despues cu e bentana pa entrega a habri, cuminsando marduga. E prome declaracion di e aña a wordo entrega 12:01 di anochi.
Un vocero pa Logius a bisa cu e problemanan a sigui diahuebs, pero mas hende por log in atardi despues cu e capacidad subi. Diaranson, Logius no kier a subi e capacidad mas pasobra cu tabatin riesgo cu DigiD no lo traha mes.
“E sistema a wordo analisa y mehora desde diaranson anochi, pues awo e por maneha un aumento den capacidad,” segun e vocero. Ainda no ta conoci cuanto hende por log in diahuebs atardi, como cu e ta depende riba e demanda pa uza DigiD. Actualmente, e capacidad pa log in ta 400.000 pa ora. E organisacion a declara prome cu e tin e expectativa cu e situacion lo calma naturalmente diabierna.
Na cuminsamento di dia, e Departamento di Impuesto a avisa hende via Twitter pa purba atrobe despues si nan haya problema.
Individualnan priva y entrepreneurnan cu a wordo informa pa e departamento pa yena declaracion por haci esaki entre 1 di maart y 1 di mei. Casi 7 miyon individual priva y 1.8 miyon entrepreneur a ricibi un carta cu e apela den e ultimo simannan.
