Minister Arthur Dowers di Husticia ta preferi di abstene y no bay mucho den detaye riba e apelacion cu a wordo haci riba e caso di e dos Colombiano cu awordo mata den un accion policial realisa cinco aña pasa na altura di Seaport Market Place. El a bisa cu tin un caso di apelacion andando, y cu no ta cuestion cu como gobierno nan por influencia e caso aki.
E mandatario a referi tambe na e casonan reciente caminda ciudadanonan a denuncia abuso di autoridad y mal trato pa miembronan di cuerpo di polis. Sr. Dowers a bisa cu como gobierno, si un persona ta sinti cu cualkier trato cu el a ricibi di autoridad policial of di gobierno no ta bon, e tin derecho di bay keha na diferente instancia ya sea Land recherche, BIZO, y te hasta nan por bay corte.
Actualmente relaciona cu e dos Colombianonan tin caso den corte; y nan ta den apelacion “y nos mester warda e decision di corte den esaki”, e ta bisa. Minister Dowers ta agrega cu no ta asina cu “nos por influencia den niun forma e resultado di e investigacion”. Pero logicamente den e caso aki gobierno a presenta nan punto; y nan abogado a defende nan banda di medaya, y e abogado di esunnan cu ta sinti perhudica ta defende nan banda tambe. E ta kere cu na final corte mester tuma un decision.
Pa tal motibo e no kier anticipa riba un caso cu ainda ta bou tratamento di corte actualmente. “Mi ta prefera di lag’e te akinan pa loke ta e caso akinan y warda ora cu den instancia mas halto decision lo wordo tuma den corte.”
