Cu 11 voto na fabor y 5 den contra; Ley pa haci donacion na Qredits aproba den Parlamento

Den un reunion publico na Parlamento di Aruba ayera diaranson tabatin riba agenda e discusion si tabata aproba of no e ley cu ta autorisa minister di Asuntonan Economico, Comunicacion y Desaroyo Sostenibel, Geoffrey Wever pa haci un donacion di un cantidad maximo di 123.000 florin na e Fundacion Qredits Microfinanciering Nederland, como tambe cubri algun donacion realisa den pasado pa Gobierno di Aruba pa e fundacion aki.

Den esaki, minister Wever den su prome intervencion a splica cu Qredits ta un fundacion cu ta yuda companianan cu no ta haya financiamento di banconan door di hopi rekisitonan cu ta wordo solicita y cu ora un empresario kier cuminsa un negoshi no tin e rekisitonan ey ainda, den sentido aki Qredits ta un poco mas flexibel y ta duna credito na e tipo di empresarionan aki yudando e otro parti di mercado cu otronan “no ta durf di subi” manera minister a sigura.

“Mi ta kere cu e rol di Qredits den nos economia ta hopi importante y nos ta hopi contento pa wak Qredits opera den nos economia,” e mandatario a bisa.

Igualmente el a informa cu e fundacion aki a duna aproximadamente 13 miyon di salario caba na unda nan a crea casi 450 cupo di trabou y a financia mas cu 380 compania loke ta nifica cu “e relevancia y importancia di Qredits ta obvio.”

Na 2018 Departamento di Asuntonan Economico a haci un studio pa asina wak con economia di Aruba ta hinca den otro na unda cu 97% di empresanan ta empresanan chikito y esaki ta e mercado cu Qredits ta activo, “nos a ripara cu den tur studionan cu nos analisa pa cu economia di Aruba cu por ehemplo, cu educacion di nos empresarionan ta algo hopi importante, no tin opleiding pa nos empresarionan y tambe acceso na financiamento pa otro tipo di empresanan cu ta menos tradicional,” minister Wever a bisa.

Den e parti ta exactamente unda Qredits ta duna un empuhe na unda cu nan no solamente ta ofrece prestamo sino tambe ta yuda cu training cu nan Small Business Academy y nan tin Be Your Own Boss Program cu ta e programa di educacion cu ta duna empresarionan of personanan cu kier bira empresario, un training pa e porta miho prepara ora e haci su negoshi.

Minister Wever a comenta cu na november di 2021 nan a haya e peticion di Qredits pa asina ey Gobierno di Aruba yuda nan cu 123.000 florin pa un parti di e prestamo y tambe yuda organisa dos Small Business Academy y dos Be Your Own Boss Program “esakinan nos a financia caba basa riba comptabiliteitsverordening cu a bay via MB y esey a sucede caba culminando na un forma exitoso pa nos hobennan y nos empresarionan.”

Di loke ta trata e 123.000 florin, el a sigura cu diferente miembronan di parlamento a haci preguntanan hopi valido over con esaki ta funciona na unda minister Wever a splica cu Qredits a haya su fondo for di Hulanda unda cu nan ta ofrece prestamonan na 9.75% di interes, “e subsidio cu Gobierno a duna, tanto esun cu a wordo duna door di minister Xiomara Maduro y esun cu a mi ta pidi aprobacion pe awe, ta ‘random subsidies’ pasobra en berdad, 200.000 florin y 123.000 florin, ta cuanto prestamo por duna di e suma ey?”

Di e 200.000 florin el a bisa cu tabata un programa caminda Qredits a ofrece na esnan den pandemia tabatin mester di financiamento na e momento ey pa keda ‘in business’ caminda 100 empresario a haci uso di e recovering program aki unda nan a haya e interes den e prome aña di 2% pero Qredits tin su mesun fondonan, nan ta haya placa di banconan Europeo y tin cu paga interes na e banconan aki y pa nan ofrece e 2% Gobierno mester a yuda nan cu 200.000 pa cubri esey, minister Wever a señala cu “ta un ramdom subsidie cu gobierno a duna pa Qredits baha nan interes, no ta asina cu Qredits a haya un donacion pa Qredits por haci mas ganashi of pa Qredits bay dilanti, ta pa nan keda in business y nan kier a ofrece na empresarionan cu tabata casi failliet prestamonan na interesnan mas abao posibel door cu nan mes tin gastonan di financiamento y nan tin cu paga e banconan pa por haya e placa aki y p’esey nan a puntra Gobierno pa nan por baha e interes pa empresarionan aki.”

E grupo di 100 empresario pa prome aña a haya 2% di interes y di dos, tres y di cuater aña na 6.75% lo cual tabata solamente posibel door cu Gobierno a duna e subsidio di 200.000 florin manera minister Wever a declara.

E subsidio di gobierno di 123.000 florin ta pa por baha e interes pa 5.75% haciendo esaki mas adecua pa empresarionan.

Tabata na januari di 2022 Conseho di Minister a aproba pa bay den trayecto aki y prepara tur e legislacion na unda ayera 14 luna despues cu casi e fondonan reserva hera bay perdi pa proyecto aki segun minister Wever a bisa, pa e proyecto aki cu e tabata spera di haya aprobacion, “esaki ta pa ilustra cu no ta zoomar ta sinta warda y no ta respeta parlamento, e tin un trayecto cu ta tuma tempo.”

Den un di e preguntanan cu parlamentarionan a trece dilanti segun minister Wever a expresa, tabata bay den contexto politico y “mi ta lamenta esaki, pasobra mi ta kere cu e ta un bunita proyecto y hopi importante. Ora nos ta yega na e pregunta si ta permiti pa bin cu mas proyecto despues, nos tin e ley aki cu ta separa den dos caminda cu mi ta pidi aprobacion pa e 223.000 florin pa mi duna for di mi begroting e placa ey cu ta reserva, a firma un MoU cu Qredits bisando cu si ta haya aprobacion di parlamento lo haci e pago aki, si parlamento lo aproba por duna na Qredits pa e programanan por cuminsa.”

Tambe el a bisa cu na e momento ey Aruba tabata den un pandemia y cu aproximadamente 500 miyon florin a wordo duna y tabata necesario, caminda gobierno a splica kico tabata e motibo y cu tabata un situacion excepcional. “Durante e tratamento di e ley ey tur e hendenan aki tabata presente, tur a vota na fabor y e ley aki a wordo aproba unanimamente y aworaki ta haci politica cune. P’esey mi ta lamenta y ta haci como si fuera ta algo iregular pero den e landsverordening tur a vota y awe ta cuestiona cu e mesun argumento cu no a cambia, ta e mesun articulo.”

Na final di e votacion, cu cinco voto den contra y diesun na fabor, e ley a keda aproba.