Cada cas cu ser ofreci como “vacation rental” ta nifica cu tin menos pa nos propio localnan. E cantidad di casnan obtenibel pa localnan ta baha door cu personanan – cu no ta biba na Aruba – ta cumpra casnan den zona residencial cu e meta di hasi esaki un “AirBnB”.
Cu menos cas obtenibel door di e desaroyo aki pero cu un demanda grandi pa cas, e prijs pa cas ta sigui subi y bira impagabel pa nos mesun hendenan. Esaki ta stroba nos localnan di yega na nan proprio cas.
Esaki ta un desaroyo preocupante y cu tin e atencion di gobierno di Aruba. Door di falta di informacion y maneho riba “vacation rental” priva, Minister Geoffrey Wever su peticion na Conseho di Minister a wordo aproba pa asina cuminsa un estudio pa midi e impacto economico, social y pa sociedad di “vacation rental” na Aruba. E estudio esencial aki, fase 1, lo wordo ehecuta prome y basa riba e resultado di fase 1, fase 2 lo bira un conseho riba un maneho concreto y inclusivo.
Desaroyo sostenibel ta encera un sociedad inclusivo den cual cada persona por participa y logra su metanan. Cada local mester por yega na su proprio cas.
Garantisa acceso na cas adecua, sigur y pagabel pa un y tur, Sustainable Development Goal 11, ta un condicion necesario pa desaroyo sostenibel. “Mi ta sigur cu e estudio aki lo duna nos e informacion relevante pa traha maneho na beneficio di y eleva calidad di bida di nos ciudadanonan”, segun minister Geoffrey Wever.
