Ex-minister Paul Croes a presenta na KIA ayera mainta pa cuminsa paga su condena penal di 3 aña cu e tin cu husticia di Aruba pa corupcion, labamento di placa, participacion den un organisacion criminal “ontheffingfabriek”, abuso di poder como minister y a usa su fundacion di campaña pa asuntonan personal; entre otro pa paga su debe di estudio y credit card.
Paul Croes su yegada na KIA
Segun informacion interno den KIA, Croes a pasa e mesun procedura cu tur otro preso ora di intake. Prome paso ta dal su prome baño dilanti 2 bewaker den KIA pa e por wordo controla si tin contrabanda. E di dos paso ta presenta cerca e dokter pa un consulta medico unda nan ta check su salud mental y su salud fisico pa despues wordo pasa pa strafafdeling, unda cu e tin cu cumpli cu un condena di 3 aña.
E regimen penitenciario cu e ex-mandatario tin cu mantene den strafafdeling ta cu e ta bay ta cera den su cel desde 5or di atardi pa 8or di mainta y entre 12or di merdia pa 1or di merdia, e lo por ricibi bishita familiar 1 biaha pa siman.
Caso IBIS: organisacion Criminal den Cocolishi
Croes y Organisacion Criminal den Cocolishi a draai un ontheffingenfabriek. E structura di Croes a cuminsa tempo cu e tabatin su funcion como minister di Asuntonan Social, Hubentud y Labor den gabinete Mike Eman II na october 30 di 2013 tempo cu el a huramenta. Bao su mando e tabatin tres persona crucial cu a yud’e pa crea un structura criminal, unda cu G. Capriles tabata coordinador y presidente di su fundacion, Leadership & Excellence. Croes a usa fondonan di e fundacion pa paga cosnan incluyendo su credit card personal y su debe di estudio. Tambe bao su mando tabata S. Arends, kende tabata su secretaria y tambe su prima; ademas di R. Aparicio, cu ta su amigo personal kende a fungi como coordinador y chauffeur di e ex-minister.
For di eynan e organisacion criminal a cuminsa haya forma (structura), unda cu e ‘ontheffingenfabriek’ – manera Ministerio Publico a yam’e – a inicia, cu e colaboracion di otro 3 persona. Esakinan ta J. Filiciana, kende tabata e tramitador di permiso principal y un persona crucial den e organisacion; bao di Juancho cu ta A.Vasquez, propietario di Bashaka Services & Enterprises NV; y su ex-pareha F. Schwengle, cu tabata falsifica documento y haci estafa.
Corte Superior
Dia 12 di october 2021 Corte Superior a condena Croes na 3 aña di prison, 8 aña cu no mag di ocupa un funcion publico y no mag di participa den politica. E caso IBIS tabata trata di organisacion criminal manera hues a denomin’e el cual a draai specificamente den e periodo di 30 di october 2013 pa 28 di maart 2017.
Corte Supremo di Hulanda
Dia 7 di februari 2023 corte di casacion ta ratifica e sentencia di Corte Superior di 3 aña di prizon, 8 aña cu no mag di ocupa un funcion publico y no mag di participa den politica ta bira definitivo y di inmediato, na unda Ministerio Publico a cuminsa cu trayecto di ehecucion di e sentencia cu a culmina ayera.
Awor, Caso IBIS oficialmente ta cera cu e ultimo sospechoso unda e ex-mandatario ta na KIA pa asina paga su condena di 3 aña sin ningun herment legal cu e por usa mas.
