Riba un video publica riba pagina di Facebook di Gabinete Wever-Croes, minister di Energia, Glenbert Croes a comparti informacion tocante su biahe actual na Hulanda. “For di Groningen pa henter nos digno pueblo di Aruba, nos delegacion ta trahando pa nos prepara pa e decision grandi pa loke ta trata e reactivacion di full e zona di nos refineria,” minister Croes a comenta.
El a indica cu e zona aki “ta bay bira e Energy Valley, e Aruba Hydrogen Valley” unda ta bay percura pa reactiva e industria di energia cu industria di energia limpi, renobable, “cu lo cuida e medio ambiente di nos isla, e medio ambiente pa e calidad di bida di henter Aruba.” Croes a indica cu e intencion ta pa hende por haya “bon trabao, bon paga, nos contratistanan por haya bon trabao, bon contract, unda cu nos economia por florece sin cu bo tin un huma preto ta afecta e calidad di bida of e salud di henter nos pueblo.”
El a enfatisa cu e kier pa yiunan di tera prospera y alabes gobierno, nos pais “florece, mira su entradanan di un prosperidad comparti pa un y tur,” indicando cu esey ta e motibo di e biahe pa Groningen hunto cu e delegacion.
E delegacion en cuestion a consisti di representantenan di Refineria di Aruba NV (RdA), WEB Aruba NV, Elmar NV, Utilities NV, y e tabata compaña pa minister Plenipotenciario di Aruba na Hulanda, Ady Thijsen como tambe e “figura di full e desaroyo di industria di hidrogeno na Hulanda, Sr. Patrick Cnubben.” Sr. Cnubben ta e persona cu ta guiando e desaroyo di Hydrogen Valley pa Aruba na San Nicolas, Croes a indica.
“Mi ta kere cu Aruba ta tumando liderazgo den nos region pa mustra mundo henter, pero cuminsando cu nos region, unda cu loke refineria a representa pa Aruba cien aña, aworaki e Hydrogen Valley, e Energy Valley na San Nicolas lo representa un pilar economico cu no ta turismo. Ta diversificando nos economia, diversificando di turismo pa rebiba un industria energetico cu ultimo añanan tabata cera. Pa mi esey ta e importancia di e mision aki,” Croes a indica. El a bisa cu e speransa ta pa mira henter e zona di refineria redestina como e Energy Valley pa industria energetico limpi y renobable cu lo crea actividad economico creando cupo di trabao pa esnan cu a perde trabao den refineria.
Minister Croes no a duna informacion riba detayenan di e plannan cu por tin pa e zona, maske riba e video a comparti imagennan unda e delegacion ta ricibi presentacionnan riba e desaroyo aki pa e area di San Nicolas. Por spera cu na regreso di su biahe e minister lo comparti informacion di e plannan concreto cu tin pa esaki y ki accion ta bay tuma, como tambe un cronograma pa e proyecto aki.
