Weekend ultimo a clausura e temporada di Carnaval unda Aruba a disfruta y goza cu tur fervor despues di mester a warda dos aña sin Carnaval pa motibo di pandemia di Covid-19. Sinembargo, algun persona no a cumpli cu ley y a keda deteni pa polis.
Manera cu Cuerpo Policial Aruba a informa, prome, durante y despues di parada tabatin control di trafico dirigi pa unidad motorisa.
E unidad motorisa a para na diferente sitio strategicamente pa asina por haci e control di trafico.
Riba diasabra, e unidad motorisa a controla 172 chauffeur di cual 15 persona a keda deteni, incluyendo hasta un persona cu a hit and run. Di e 15 persona, 9 persona a perde nan rijbewijs door di supla hopi mas halto cu ta permiti pa ley.
Riba diadomingo, un biaha unidad motorisa tabata activo riba carteranan di Aruba cu control den trafico dirigi riba coremento di auto bao di influencia di alcohol.
Por a tuma nota cu a controla varios chauffeur y a detene den total di 10 persona, di cual 5 a perde nan rijbewijs.
Locual cu a hala atencion ta cu hoben nan jong den careda di 18 aña ta core auto bao influencia di alcohol y ta perde nan rijbewijs caba.
Cuerpo Policial ta keda haci un suplica pa NO maneha auto bao influencia pasobra e tin consecuencia pa bo den futuro!
