Ayera tardi na Prinses Amalia Basisschool a tuma luga e celebracion di carnaval pa e muchanan di Centro Traimerdia Oranjestad. E muchanan a luci fantasia di carnaval di San Valentin y nan gosa di un atardi yena cu ambiente carnavalesco.
Reportera di Bon Dia Aruba a combersa cu juffrouw Kathy Farro, leidster di Centro Traimerdia Oranjesatd, encarga cu grupo 7. El a splica cu e celebracion nan a organis’e hunto cu full e team di Traimerdia Oranjestad y alrededor di 100 mucha a gosa di e atardi cu ambiente di carnaval. .
Nan a plania algo pa e muchanan cu emta pa nan por experiencia kico ta carnaval mas di cerca. Nan a haya presentacion di TBS brassband y nan disfruta di musica di carnaval den man di e diferente cantenatanan di carnaval, manera Soca Monarch, King Casper, Rey di Tumberito, King Carl y mas.
“Awe e muchanan lo experiencia kico otro muchanan di nan edad tambe ta experiencia den carnaval,” el a bisa.
Centro Traimerdia Oranjestad a duna tambe TBS un plakkaat pa gradici y reconoce nan. “Mirando cu nos ta un team chikito y a base di esey tin biaha no tin e budget necesario pa e celebracionnan aki, pero tambe ta leuk pa reconoce cu nan tambe kier duna algo na e muchanan, motiva nan pa nan tambe por doe mee cu carnaval,” Farro a finalisa.
