Vaping of sigaria electronico a cuminsa bira tendencia for di algun tempo caba entre hende adulto, pero for di algun tempo e fenomeno aki a drenta den comunidad escolar, den esnan di mas hoben cu no sa kico ta su efectonan secundario.

Vaping ta e inhalacion di e vapor crea pa un sigaria electronico of otro aparato pa Vaping. Su obhetivo ta pa humamento y nan ta funciona cu bateria, algun di nan ta yen cu un likido cu pa hopi biaha ta contene nicotina, saborisante y substancia kimico. E likido ta bira cayente y despues ta bira e vapor cu e persona ta inhala. Ta p’esey cu consumi sigaria electronico ta ricibi e nomber di “Vaping” (di vapor).

Den dianan aki, diferente medio di comunicacion a bin batiendo alarma tocante e fenomeno aki na unda cu expertonan como Fundacion Anti Droga Aruba (FADA) ta papiando di e tema aki for di algun aña caba den nan charlanan pa asina ey tanto muchanan como hobennan y nan mayornan bira mas consciente di e tendencia aki cu por resulta un peliger pa salud.

American Cancer Society riba su website ta indica cu e dispositivonan electronico aki ta conoci pa diferente nomber y ta diseña pa suministra nicotina. Debi na esaki Food and Drug Administration di Merca ta califica e producto aki como ‘productonan di tabaco’.

Ora e producto aki ta contene nicotina esey ta causa daño na desaroyo celebral di e hobennan cu por ta un daño permanente ya cu e aparato ta hinca dopamina den celebro lo cual ta haci sinti e persona bon y ta pidi na e curpa bolbe haci uso di esaki, creando asina un adiccion. Si esaki ta wordo usa durante embaraso e nicotina tambe por causa e nacemento di un baby prematuro of cu poco peso ora nan lo nace.

Otro efecto cu a wordo descubri pa esaki ta ‘Popcorn Lung’ cu ta un tipo di bronkitis loke ta haci mes cos cu un popcorn cu ta explota y pulmonnan ta haya buraco na diferente parti.

Vaping a wordo prohibi na Merca caba for di aña 2020 ya cu e por causa un explosion, door cu e aparatonan aki ta usa cierto bateria y cierto kimiconan, esaki por explota y esey a pasa caba na Merca.

Igualmente, a haya sa cu e dispositivo aki a wordo introduci na mercado pa personanan cu tin un adiccion pa cu sigaria y asina nan por disminui e consumo di sigaria, pero na henter mundo y na Aruba tambe e hobennan a cuminsa haci uso di dje sin sa e consecuencianan tras di esaki cu a bira un tendencia cu ta wordo haya no na tur scol pero si na algun di nan unda ta hayando casonan caminda cu docente ta gara studiantenan cu vaping den baño na scol, incluyendo scolnan basico no solamente secundario na unda ta wordo haya e aparato mes di Vaping of e likido.

Recientemente FADA a indica tambe cu docentenan a yega di yama na FADA pa puntra nan kico e aparato ey ta of si nan tin un conocemento di dje cu ta resulta e “famoso Vaping”.

Esaki no ta algo nobo pero si nos por ripara cu e ta birando un problema mas grandi na unda cu pa hopi biaha e muchanan no ta usa vaping pa motibo cu nan tin gana di huma nicotina, nan ta hum’e pa via cu nan ta wak hende cu ta haci’e y no solamente hende rond di nan, pero rednan social ta haci hopi propaganda pa e tipo di aparatonan aki.

E propaganda aki ta wordo haci di tal forma cu e hoben ta hayando gana di usa esaki. Vaping tin mas o menos 8.000 tipo di sabor y algun di nan tin un smaak cu ta trapa e hobennan cu ta pensa cu esaki no tin ningun daño compara por ehemplo si nan ta cumpra un sigaria di algun marca reconoci.

Algun di e aparatonan aki ta parce un USB y e persona mes por conect’e den su computer, pa motibo cu ta genera menos shinishi compara cu otro sigaria. Aunke muchanan mes no haci uso di dje tur dia e manera con nan por bira adicto p’e ta varia.

Centers for Disease Control and Prevention (CDC) conhuntamente cu FDA di Merca na october di 2022 a publica un comunicado di prensa unda ta señala cu “mas di 2.5 miyon hoben di scolnan secundario y superior a reporta di usa vaper na 2022.” Den e conclusionnan ta señala cu entre un pa cuater hoben ta usa e vaper pa dia lo cual ta keda como un preocupacion grandi mirando e riesgo grave pa salud publico di e hobennan.

FADA como fundacion ta duna tur tipo di informacion na tur scol y tur aña nan ta zorg pa manda nan lista di charla y lista di informacion pa nan duna na scolnan y e ta keda semper na scol pa invita FADA y asina ey nan por asisti y educa e hobennan riba e topiconan aki.