(AP) – Ohio su gobernador kier pa e estado rekeri consentimento di mayornan pa muchanan bao di 16 aña por crea cuentanan riba TikTok, Snapchat y otro plataforma di rednan social.
Gobernador Republicano Mike DeWine su proposicion di presupuesto pa 2 aña lo crea un ley unda cu companianan di rednan social mester ricibi un mayor su permiso pa e mucha por crea un cuenta riba rednan social y aplicacionnan di videogame. E proposicion tambe ta nombra plataforma manera YouTube, Facebook y Instagram, sinembargo e proposicion lo aplica ampliamente na “cualkier sitio web, servicio online, producto online of funcion online cu ta rekeri consentimento di usuario pa registra, crea un cuenta of di otro manera crea un nomber di usuario unico.” Gobernador Jon Husted, ken ta lidera e iniciativa a bisa cu esaki no lo aplica na “comercio online” of “online shopping.”
Companianan suheto na e regulacionnan lo mester produci metodonan pa determina si un usuario tin menos di 16 aña di edad y manda confirmacion por escrito na e mayornan pa asina verifica cu nan consentimento ta real. Si mayornan no firma of acepta e compania su terminonan di servicio, nan yiunan no por haci uso di e plataforma. E restriccionnan lo aplica solamente ora di crea un cuenta nobo.
Companianan di rednan social tambe lo mester crea un pantaya di introduccion conoci como un ‘splash page’ unda cu mester verifica e edad. Si e usuario indica cu nan tin menos di 16 aña, un mayor por verifica consentimento pa medio di firma un formulario digital, unda cu ta provee identificacion di gobierno, ta conecta cu “personal cu tin training” via videochat, usa un forma di pago pa sistemanan online of yamando un number liber di costo.
Un proposicion similar a ricibi sosten anteriormente na Connecticut sinembargo te ainda esaki no a bay na ronda di votacion.
