Recientemente a sali ariba algun medio di comunicacion cu Aruba, hunto cu Corsow, ta aparece riba un lista ‘shinishi’ di Union Europeo di paraiso di impuesto. Esaki, segun ta ser indica, ta pa motibo cu Aruba no ta cumpli cu e norma- y rekisitonan necesario pa ser elimina di e lista aki.
Den bista di e noticianan aki, Minister di Finansas di Aruba, Xiomara Maduro, a publica un reaccion ariba Facebook adresando e noticia aki y ta indica cu e informacion aki ta completamente incorecto.
Den su reaccion, Minister Maduro ta indica cu Gobierno di Aruba, pa medio di Departamento di Impuesto tin un relacion estrecho cu e seccion di impuesto di Comision di Union Europeo pa por cumpli cu tur e rekisitonan ora cu ta trata normanan internacional pa evita cu Aruba ta ser categorisa como un pais complaciente pa contribuyentenan por evadi impuesto.
Segun el a sigui splica cu e siman aki e delegado di Comision di Union Europeo cu ta atende cu Aruba, a confirma cu Aruba su compromiso riba criteria 1.1. di AEOI lo ser registra door di ECOFIN.
Den un comunicado di prensa, e delegado di e Comision di Union Eurpeo a clarifica cu lo inclui Aruba riba e lista di Anexo II di “Council Conclusions” cual ta un documento cu ta indica cu ambos Aruba y Corsow a compromete nan mes pa mehora nan determinacionnan di e Forum Global pa loke ta trata e intercambio automatico di informacion ariba cuentanan financiero.
“E lista di Anexo II ta refleha e cooperacion continuo entre e Comision di Union Europeo cu su partnernan internacional y e compromisonan di e paisnan aki pa reforma nan legislacion pa por cumpli cu standardnan di bon gobernacion fiscal manera acorda,” Minister Maduro ta indica den su reaccion.
El a sigui splica cu si acaso Aruba lo no tabata cooperando cu Comision di Union Europeo, Aruba lo a ser inclui den e lista di paisnan (jurisdictions) cu no ta cooperando, pero el a remarca cu afortunadamente Aruba ta actuando cu tur seriedad den henter e proceso aki y ta percura pa cumpli debidamente cu tur e rekisitonan pa evita un scenario negativo.
Por ultimo Minister Maduro a sigura e comunidad di Aruba, cu Aruba ta cooperando y ta cumpliendo cu e compromisonan cu Comision di Union Europeo. “Nos Pais no ta aparece riba e lista di paisnan di paraiso di impuesto.”
