Mediante un comunicado di prensa, ayera atardi Gobierno di Aruba a informa cu probablemente Aruba ta bay habri su frontera maritimo cu Venezuela si e pais aki ta cumpli cu condicionnan cu a wordo estableci.

Den e comunicado ta indica cu dia 31 januari 2023 a tuma luga e di tres reunion tecnico pa cu reapertura di frontera entre e paisnan den Reino y Venezuela desde cu a cera frontera na 2019 na unda tambe a wordo treci dilanti cu Aruba kier traha riba reapertura di frontera den fasenan.

E prome fase, lo ta e frontera maritimo, pa asina ey por importa productonan mas barata di Venezuela, fruta, berdura, comestibel, material di construccion. “Esey lo yuda nos baha costo di bida. Trabounan pa logra esaki ta hopi avansa.”

Pa loke ta trata e fecha, Aruba a indica cu 1 di mei por habri frontera maritimo, con tal cu lo haya e documentacion necesario di Venezuela no mas tarda cu 31 di maart, si prome cu e fecha ey Venezuela cumpli, Aruba por habri frontera dia 1 di mei.

E di dos fase, ta apertura di frontera aereo, pero pa esaki no tin fecha ainda. Akinan nan a splica cu tin hopi trabou pa haci ainda y departamentonan den e area di husticia, inmigracion y aviacion civil ta trahando riba esaki.

“Aruba por habri frontera ora nos ta cla p’e. Gobierno di Aruba ta keda pendiente di Venezuela pa cumpli cu e condicionnan,” e comunicado ta señala.

Na comienso, frontera di Venezuela cu Aruba a ser cera pa presidente di Venezuela Nicolas Maduro pa un periodo di 72 ora dia 05 di januari di 2018, e medida aki tambe tabata dirigi pa e islanan di Corsou y Boneiro, na e tempo ey, el a sigura cu e decision aki tabata “pa presiona pa un intercambio sano”.

Na 2019, prome minister Evelyn Wever-Croes a tuma nota cu vice-presidente di Venezuela a declara cu nan tabata dicidi pa habri e frontera pero, dia 10 di mei el a firma un decreto pa cera e frontera entre Aruba cu Venezuela, esaki motiva na e situacion politico, economico y social cu e pais bisiña tabata pasando na unda Aruba a registra un aumento di migrantenan cu na e momento ey, por tabatin efectonan pa loke ta trata orden publico y siguridad di Aruba cu ta den interes general.

For di e momento ey, ningun boto ni avion tanto comercial como di carga por a drenta Aruba biniendo for di Venezuela, loke a causa cu berduranan y frutanan cu un prijs mas accesibel no por drenta na e isla mas y cu residentenan di Aruba solamente por biaha pa Venezuela for di otro paisnan como Panama y Republica Dominicana, lo cual ta trece como consecuencia gastonan hopi halto pa e biahero mes.

Mientras tanto, Venezolanonan na Aruba como na Venezuela ta sigui na espera di e cooperacion necesario cu e tema aki tin mester di autoridadnan Venezolano, aunke ta importante pa destaca cu Venezolanonan mester solicita un visa pa por drenta na e isla.