Ayera atardi Aruba Airport Authority (AAA) a realisa un conferencia di prensa pa asina anuncia con e proyecto Gateway 2030 ta na e momento aki na unda minister di Turismo y medionan presente a realisa un bishita na e luga di e construccion.

Prome cu e bishita tanto minister como director ehecutivo di AAA Joost Meijs, hunto cu ekipo di proyecto y prensa a haya nan vestnan pa asina ey haci esaki di manera sigur y protegi hunto cu Oficina di Gestion di Proyecto (PMO) cu ta involucra cu e proyecto Gateway 2030.

Gilbert Rafael, hefe di desaroyo y tecnologia di AAA acompaña pa ekipo di PMO Sr. Henry Balentin, Sr. director di proyecto Sr. Gerard Turk, ingeniero residente, y Sr. Gerko Rijkers, den representacion di compania contratista ABC Project Venture a duna na minister e informacion di e ultimo actualisacion y conocemento riba e proceso den curso di e Fase 1A y e cronograma cu tin pa por entrega e proyecto na tempo.

Tocante e otro fasenan di e proyecto a elabora y splica di e componentenan basico di e fasenan aki.

“Nos ta contento y orguyoso di por mustra na minister Oduber e ultimo avancenan pa loke ta trata e proyecto importante aki Gateway 2030 cu na e momentonan aki ta den su prome fase, esaki ta wordo programa pa completa na e di tres trimester di 2024 y e siguiente fase lo cuminsa e mesun aña,” Joost Meijs a bisa.

E fase 1A di e proyecto aki cu tin un aña y mey cu a cuminsa, ta abarca principalmente e ampliacion di edificio unda turistanan Mericano ta haci nan check in, e area aki den futuro ta bay bira e principal terminal di check in pa tur e biaheronan di salida.

Den e fase 1A tin aproximadamente 200 persona trahando den area aki incluyendo trahadonan di AAA, compania contratista, entre otro empleadonan directo y indirecto segun loke Rafael a splica.

Esaki tambe ta inclui e desaroyo y instalacion di sistema di manipulacion di ekipahe y e zona nobo di preparacion di ekipahe.

E fase 1B ta bay inclui e ampliacion di e area actual di gate 8 y e creacion di dos area di sala di espera cu lo wordo atendi cu tres gate di contacto y un di embarke. Igualmente Rafael a mencion cu nan a hinca mas sostenibilidad como parti di nan strategia y nan a incorpora infrastructura pa panel solar pero tambe otro cosnan como reuzo di awa di yobida pa flush WC y otro cosnan cu nan kier incorpora.

E proximo fasenan di e proyecto tambe ta wordo evalua na e momentonan aki y lo wordo inclui den e proyecto Gateway 2030, como por ehemplo un area nobo di concesion unda ta e gatenan pa biaha den area Mericano, instalacionnan nobo pa e yegada y ampliacion di areanan di servicio den e terminal di salida.

Minister Oduber a expresa cu nan como prensa a haya un splicacion amplio di loke ta trata e proyecto Gateway 2030 cu despues di un aña y mey cu trabounan a cumins, nan ta den 50% di e ehecucion na unda nan ta cumpliendo cu e planning pa e proyecto wordo entrega na su fecha acorda.

Fase 1A ta un inversion di 143 miyon dollar manera minister Oduber a sigura y despues lo sigui cu fase 1B, fase 2 y 3 unda cu “e proyecto aki ta hopi importante pa nos turismo, nos economia teniendo en cuenta e limitacion di capacidad cu nos tin na e momentonan aki y teniendo en cuenta e expansion di e cambernan cu Aruba ta experenciando cu varios hotel nobo cu ta den construccion y p’esey ta necesario tambe pa nos amplia nos aeropuerto y percura pa e bon infrastructura pa cumpli cu tur e deseonan di nos bishitantenan,” el a bisa.

Igualmente el a trece dilanti cu e proyecto aki ta wordo ehecuta pa contratistanan local unda por mira con e proyecto ta bayendo lo cual ta duna ehempel na tur otro proyectonan den futuro cu contratistanan local creando cuponan di trabou.