Bruce Willils ta ser diagnostica cu demencia y su condicion ta empeora

(AP) – Practicamente un aña despues cu Bruce Willis su famia a anuncia cu e lo retira di su carera como actor despues di a ricibi diagnostico di Aphasia, su famia a bisa cu su “condicion a progresa.”

Den un declaracion publica diahuebs, e actor di 67 aña su famia a bisa cu Willis a ricibi un diagnosis mas specifico unda cu a constata cu su persona ta padece di demencia. “Mientras esaki ta doloroso, e ta un alivio cu finalmente nos por tin un diagnosis cla,” e declaracion a bisa. “FTD ta un malesa cruel cu hopi di nos nunca a tende di dje y por afecta cualkier persona.”

Maart ultimo, Willis su famia a bisa cu Aphasia a afecta su habilidadnan cognitivo. E condicion a causa perdida di e habilidad di compronde of expresa palabranan. Den diahuebs su declaracion, e famia a bisa cu e fayonan den comunicacion tabata solamente un sintoma mas di FTD, cual ta un tipo di demencia.

Association for Frontotemporal Degeneration a describi FTD como un grupo di desorden den e cerebro causa pa e degeneracion di e partinan frontal di e cerebro cu ta afecta comportamento, lenguahe y movecion. Aphasia por ta un sintoma di esaki. E asociacion ta describi e degeneracion aki como un “disminucion inevitabel den funcionnan” cu un averahe di bida di 13 aña despues cu e sintomanan a manifesta. “Awe no tin tratamento pa e malesa, un realidad cu nos ta spera cu por cambia den e añanan binidero,” e famia su declaracion a sigui expresa, agregando cu e pro tuma añanan largo pa por ricibi un diagnosis concreto. “Mientras Bruce su condicion ta sigui avansa, nos ta spera cu cualkier medio su atencion por ser enfoca riba e malesa aki cu tin mester di mas conscientisacion y investigacion.”

E declaracion cu a ser publica riba e sitio web di Association for Frontotemporal Degeneration y a ser firma pa e casa di Bruce Willis, Emma Heming Willis y su ex pareha Demi Moore ademas di su 5 yiunan, Rumer, Scout, Tallulah, Mabel y Evelyn.

Cu un carera di mas di 4 decada, Willis su peliculanan a genera ganashi di mas di 5 biyon dollar mundialmente, hopi stima pa su hitnan manera “Die Hard” y “The Sixth Sense.”

“Bruce semper a busca e felicidad den bida, y a yuda tur hende haci mescos,” e famia a declara. “E ta nifica hopi pa nos pa mira e amor aki bolbe back na su persona y na tur di nos. Nos ta hopi conmovi pa e amor cu boso a comparti pa e ser stima aki. Bo compasion, comprendemento y respet lo permiti nos yuda Bruce biba un bida cu e calidad mas halto cu ta posibel.”