InselAir International, e compania di e aerolinea na Corsou, no kier keda cu nan compania na Aruba, esta InselAir Aruba mas.
E motibo ta cu e compania Arubano ta perdiendo hopi placa como cu mayoria di e flota registra na nos isla ainda ta riba tera. E prohibicion di bula ya ta bay den su di 6 siman. E maneho di e aerolinea ta bisa cu nan no kier cu e situacion na Aruba ta hinca e compania na Corsou den mas problema. Pa motibo cu e siman aki e autoridadnan na Aruba a ground un avion atrobe, cual tabata un Fokker 50. E prohibicion aki si tabata temporalmente.
Awor e accionistanan di InselAir ta deliberando si lo bay cera e compania na Aruba.
InselAir a haya un otro sla atrobe como cu e ministerio di Asuntonan Exterior di Inglatera tambe a adverti pasaheronan di bula cu e aerolinea. Esaki pasobra nan ta preocupa cu e siguridad di e avionnan. Segun e ministerio nan ta basa nan mes riba e decision di gobierno di Hulanda cu luna pasa a prohibi su ambtenaarnan pa bula cu InselAir. E decision aki ta basa riba esun di consulado Mericano cu a cuminsa adverti na prome. Desde 1 di februari personal di e consulado no mag di bula mas cu e aerolinea.
Segun e aerolinea e advertencia aki ta basa riba e decision di autoridadnan na Aruba, e departamento di aviacion civil, cu a dicidi di ground henter e flota registra na nos isla. Y segun e fundado di InselAir, Edward Heerenveen, tin un motibo straño su tras cu no tin di haber cu e siguridad di e avionnan. Den un relato cu InselAir a saca despues, nan ta indica cu e prohibicion tin di haber cu e beslag cu departamento di impuesto a pone riba e compania di aviacion pa motibo di debenan di belasting.
