Den un comunicado di prensa Banco Central di Aruba (BCA) a informa cu conforme e tarea di e Comite di Maneho Monetario (CMM) pa evalua, dirigi y duna transparencia riba e accionnan di maneho monetario di BCA, e banck ta informa cu durante e reunion di 16 di december 2022, CMM a dicidi pa hisa e tasa di reserva obligatorio cu 0,5% pa 25,5% entrante 1 di januari 2023. Esaki kiermen cu e banconan comercial mester tene un balansa minimo na BCA cu ta igual na 25,5% di e depositonan riba termino cortico di nan clientenan.
Den e comunicado nan ta splica cu e decision aki ta basa primordialmente riba e nivel amplio di likides excesivo na e banconan comercial cu ta persisti ariba nivel pre-pandemico, y e bahada den rapidez cu e nivel di likides excesivo ta disminuyendo cu datonan preliminario di november 2022 atrobe registrando un subida.
E subida aumento den reserva obligatorio tin como meta pa sigura un bahada gradual di likides excesivo na e banconan comercial, pero CBA ta determina pa, basa riba desaroyo den nivel di likides den lunanan cu ta bin, pa un bes mas hisa e incremento, si ta
considera esaki necesario.
E comunicado a sigui splica cu teniendo na cuenta informacion y analisisnan internacional, BCA ta anticipa cu e reservanan internacional lo keda ampliamente riba e rekisito di tres luna di pago riba e cuenta coriente di e balansa di pago. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero.
Pa loke ta inflacion, e comunicado ta indica cu na october 2022, e Indice di Prijs di Consumo (IPC) a subi cu 7% compara cu e mesun luna di e aña anterior, mescos na final di september 2022. E aumento aki tabata causa door di e crecemento den prijs di utilidad, cu a afecta e componente di ‘vivienda’. Tambe e prijs di gasolin a aumenta, cu na su turno ta impacta e componente di ‘transporte’ y e componente ‘cuminda y bebida no alcoholico’.
E inflacion midi riba promedio di 12 luna a subi di 4.3% te na 5,1%. BCA ta estima cu e preshon inflacionario eleva lo persisti durante e resto di 2022, debi na e nivel eleva di prijs di petroleo riba mercadonan internacional y e ahustenan recien den prijs di awa y coriente. Ademas, BCA ta premira cu Aruba lo importa un gran parti di e aumentonan den prijs for di su partnernan di exportacion, particularmente Merca y Europa.
