Misha Raymond: “E deber ta pa duna pueblo su defensor di pueblo”

Ayera mainta fraccion Raiz a tene un conferencia di prensa, durante cual lider di e fraccion den Parlamento di Aruba, Misha Raymond, hunto cu su colega parlamentario Raymond Kamperveen, a elabora ariba diferente topico actual y relevante den e ultimo temponan.

Raymond a splica 23 di januari, como co-firmante di e ley pa cambia cierto aspectonan di e ley di ombudsman (defensor di pueblo), el a para den sala di parlamento y defende esaki. E ley a haya sosten y esaki ta nifica cu pueblo por conta cu su Ombudsman dentro di poco y tur e proceso a cuminsa cana.

“Loke mi ta sumamente contento y orguyoso ta cu mi mes a agrega un parti den e ley cu ta duna un tarea special na e Kinder Ombudsman (defensor di mucha)”, Raymond di a indica.

E tarea aki ta pa haci investigacion ariba si hoben- y muchanan ta wordo trata di un manera igual si of no, si nan ta ricibi e trato igual. “Esaki ta algo cu mi sumamente orguyoso di dje pasobra niun otro ley di Ombudsman den nos reino tin esaki,” el a agrega.

Fuera di esey, el a sigui splica, e ley ta conta tambe cu hendenan cu tin keho of tin preocupacionnan cu companianan estatal, por ehemplo WEB o Elmar, nan por acudi tambe na e Ombudsman pa presenta esakinan.

Tabatin hopi conmocion pa loke ta a retiro di e Ombudsman. Raymond a recorda cu aña pasa caba nan a trata e ley aki pa purba di hankr’e den e constitucion, pero esaki no a haya e sosten pa motibo cu tin diferencia di opinion politico.

“Semper mi ta bisa cu aunke tin un diferencia di opinion politico, ainda nos tin un deber y e deber ta pa duna pueblo su defensor di pueblo. Esaki ta locual a tuma luga.”

Raymond a remarca tambe cu Ombudsman ta bay trapa tenchi di gobierno, esey ta algo cu ta bay pasa y segun e ta enfatisa e ta algo positivo cu pueblo lo ripara y cu ta importante tambe pa mantene un bon orden, na unda pueblo por conta cu nan ta entrega nan keho, ta haci investigacion y cu tin un defensor cu ta para pa nan tambe.

Pa loke ta e tema di e ley di matrimonio di mesun sexo, Raymond a splica cu ainda no a bay den cassatie y no a tuma un decision si ta bay of no ta bay.

E punto di bista di Raiz, el a enfatisa, ta hopi fuerte den esaki ya cu nan ta para pa igualdad. “Mi a firma e ley di matrimonio di mesun sexo, mi ta kere cu nos mester duna sosten y oido na esnan cu ta sufri pasobra di nan orientacion sexual. Mi ta traha como psicologo 10 aña caba, mi a wak hopi cos pasa mi dilanti, for di hoben te cu adulto, cu ta pasa den cierto desaroyonan,” el a agrega.

E debate politico tocante e topico aki mester tuma luga y posiblemente pa fin di februari e conseho di Raad van Advies ta yega pa loke ta e ley y despues di esey por cuminsa cana e proceso y trece e ley den parlamento.

Raymond a remarca cu e no ta premira cu tin algo cu lo por para e ley. E topico aki ta un discusion fuerte den comunidad, e ta bay ta un discusion fuerte den Parlamento tambe y si wak den pasado con e proceso a bay pa registracion den censo di parehanan di mesun sexo, e tabata un discusion basta fuerte tambe.

“Mi ta para riba dje. Mi no ta firma un ley por nada y mi kier wak e tambe realisa su mes den parlamento,” el a señala.

El a ratifica cu mester duna respet na tur hende su opinion tocante esaki y no ta un secreto cu tin diferencia di opinion pa loke ta nan partner den coalicion y tin diferencia di opinion den oposicion, pero e ta subraya cu e no ta haya esey ta un motibo of un rason pa no trece e ley den parlamento.

Bayendo ariba otro topico, un bon noticia cu Raymond a anuncia, ta cu e ley pa cuminsa cubri terapia di logopedie parcialmente, 90%, a cuminsa cana su caminda. Esaki ta un ley cu Raymond ta indica el a habri su aña parlamentario cune como mocion pa haya sosten pa e wordo cubri den AZV.

“E famianan y sobretodo mamanan soltero cu tin muchanan cu tin desafionan, retonan den e desaroyo di nan yiunan, terapia di lenguahe ta siña nan papia, ta un di e prome pasonan cu nos muchanan mester tuma pa yuda nan hancra miho socialmente, pero tambe ora nan ta na scol y con nan ta sigui desaroya na sco,” Raymond a bisa.

Parlamentario Kamperveen a trece pa dilanti entre otro e topico di LNG cual ta uno hopi importante pasobra 2024 ta eynan mes y nan no ta mirando ningun movecion y e parti mas importante cu Raiz ta para pe ta naturalesa, y pesey pa nan ta importante pa sa con a bay cu e environmental social impact assessment.

Kamperveen a splica cu nan a compronde door di haci pregunta y investigacion cu aworaki e evaluacion ta na Departamento di Naturalesa y Medio Ambiente pa nan por keur esaki y asina e por haya su permiso.

“Un banda nos tin cu corda tambe cu en berdad nos como Raiz ta para pa e cambio y LNG ta e transicion, pero e mester bay man den man cu naturalesa y nos ta tene cuenta cu esaki pasobra nos ta para pe,” el a enfatisa.

Como fraccion Raiz a haci nan preguntanan, nan a haya contesta riba nan, pero e siman aki LNG a duna un presentacion na gobierno, Kamperveen a señala cu ta na su luga pa nan duna presentacion na Parlamento di Aruba tambe y informa con leu nan ta pasobra tin hopi tempo cu nan no a tende nada di nan y ta importante pa sa con ta para cu e proyecto aki.

Otro tema cu Kamperveen a mencion ta un mocion cu nan a trece pa dilanti tocante loke ta pago online pa industria creativo cu ta algo hopi importante y algo cu nan a haya bon reaccion riba dje. El a splica cu nan bay diferente caminda pa haya conseho y prome cos cu nan mester haci ta un estudio. El a sigui splica cu nan a acerca Universidad di Aruba pa haci un estudio pa wak kico ta e posibilidadnan y esaki tambe ta bay hunto cu Centrale Bank van Aruba.

El a agrega cu na aña 2012 ya caba a tuma luga un estudio di esaki, pero segun el a indica esaki a pega na Centrale Bank y na Gobierno di Aruba.

Otro topico importante cu e parlamentario a trece pa dilanti ta esun di Arubus. For di aña pasa caba tin hopi preguntanan ta wordo haci por ehempel tocante e busnan, e situacion di e trahadonan y hasta e situacion financiero. Manera ta conoci na aña 2010 ya caba gobierno a pidi parlamento un remision di loke ta trata belasting di e trahadonan, loonbelasting AOV y AZV

Kamperveen a ratifica cu aworaki tanto aña despues, su pregunta na Minister Ursell ta con ta para cu e situacion financiero di Arubus, apart di e situacionnan cu ta sucediendo den e ultimo dianan aki.

Por ultimo el a toca tambe e topico di Serlimar. Un di e problemanan mas grandi cu el a menciona ta cu ainda candela ta wordo cendi na dump di Parkientenbos locual ta un preocupacion grandi pa Raiz. “Pero tin cambionan grandi ta tumando luga, preguntanan a wordo haci na e minister concerni, e preguntanan ta surgi pasobra en berdad e preocupacion mas grandi ta con ta bay controla pa no cende e dump na candela mas,” el a finalisa.