Pa mira tur documento relevante click aki

“Mi kier mi placa bek pa mi por cumpra algo otro na Aruba pasobra esey ta mi soño”

Bon Dia Aruba ta sigui treciendo dilanti diferente caso di personanan cu presuntamente a bira victima di un estafa di parti di loke tabata Acqua Condominium Aruba cu a bira Radisson Blu Hotel.

Den ocasion aki, redactor di Bon Dia Aruba a tene un conversacion telefonico cu e Sr. Jose Potenza Perez di 79 aña, di nacionalidad Venezolano ken conhuntamente cu su yiu homber Jose Potenza Zerpa tambe a cumpra dos apartamento den loke na e momento ey tabata yama Acqua Condominium na aña 2008, un inversion cu ta surpasa e cifra di 450.000 dollar.

Den su entrevista, Potenza a afirma cu nan a wordo atendi pa e Sr. Oscar Helmeyer ken tabata fungi como gerente di Benta y e rumannan Marcolli ken nan tabata e desaroyadonan na e momento ey.

“Nos a cumpra e apartamentonan y nan a duna nos e documentonan di compra na unda ta indica claramente kico nos tabata cumpra of con nan lo a mester inverti nos placa,” Potenza a bisa.

Den e inversion tabata inclui asfalt, e cura di e condominio, e pool, areanan social y e tereno cu tabata ekivalente na 55% di nan inversion, 45% restante tabata pa e construccion di e area habitacional.

Den un articulo di aña 2021 riba e website www.enlacearquitectura.net cu redactor di Bon Dia Aruba a haya ta indica cu “Acqua ta un hotel di Radisson Blu cu a cuminsa na aña 2016 cu e cambio di un ‘compleho di apartamentonan cu no a wordo culmina’, Enlace Arquitectura a yuda e cliente den re-diseño di edificio pa un di hotel.”

Loke ta sigui hala atencion ta cu ni un di e inversionistanan aki a wordo puntra si nan tabata di acuerdo cu e cambio aki, si nan tabata di acuerdo pa cu e apartamentonan bira un hotel di luho manera Potenza tambe ta sigura “door di e articulo aki mi a haya sa cu nan a cuminsa traha hotel na 2016, mi no tabata sa di esaki, nan a mester pidi un autorisacion na nos, e doñonan cu a cumpra apartamentonan HABITACIONAL, cu tin parti di e propiedad.”

Wardando for di 2008, e tempo a pasa na unda cu na 2017 nan a haya un e-mail di un inversion nobo cu mester a haci den e apartamentonan, den e e-mail ey tabatin dos punto importante manera Potenza a sigura cu ta un parti di e modificacion di portanan, cashi paña, cushina y otro mueble como labamano cu nan kier a cambia pa otro di un calidad mas miho supuestamente, tur esaki na un costo di 14.000 dollar pa cuminsa.

Potenza a acepta e cambionan aki pero na e mesun aña ey a aparece e Sr. Venancio Gonzalez cu ta e desaroyado nobo, “esey a cay un sorpresa pa mi, pasobra el a bisa mi cu e tin otro inversion pa cambia e area di tecnologia como alarma y internet na unda nan tambe kier a cambia e yabi di porta pa esun cu hotelnan ta usa, mi a nenga pa esaki di biaha pasobra mi no kier un hotel, mi kier mi yabi di porta normal di un apartamento, kiermen nos mester a paga e cambio di yabi sin sa cu e proyecto lo a bira un hotel, que casualidad.”

Pa e tempo ey Potenza a sigura cu el a haya e extension di contract cu Acqua a manda na tur esnan cu a cumpra yama ‘adendum’ den esaki el a splica cu el a mester “colabora” pa e desaroyado por entrega e documento di propiedad.

“Un colaboracion ta algo boluntario y spontaneo, no ta un obligacion, un colaboracion ta cu nan ta bay condiciona bo propiedad pa bo por firma e adendum y e adendum ey ta nifica cu mi ta renuncia na loke mi tin, den palabranan corto nan ta bay laga mi un camber cu airco, esey so.” Potenza a comenta.

Terenonan cu ta conecta e area pa yega na apartamentonan hasta e pool ta bay pa Acqua si Potenza hunto cu otro inversionistanan cu tambe a cumpra den e proyecto aki cu ta wordo calcula ta yega rond di 30, ta firma e adendum aki. “E ora ey mi ta cambia mi derechonan di propiedad y nan ta bay duna mi un derecho di uso, abogado di Acqua a bisa mi esey,” el a sigura.

Bon Dia Aruba a publica un articulo diaranson ultimo 8 di februari di un pareha Argentino cu tambe a cumpra dos apartamento den e proyecto aki na unda nan a bin Aruba na 2022 despues di un largo proceso hudicial y cu dos sentencia di hues cu ta indica cu nan mester haya nan propiedad despues di 14 aña cu a wordo cumpra, dos dia prome cu e caso lo a mester bin dilanti nan a haya sa cu si nan no ta firma adendum tampoco nan ta haya nan propiedad na un 100% sino entregando na Acqua 50%, mesun situacion cu Potenza. “Kico esaki ta nifica? Mi no compronde con nan no por a firma cu dos sentencia di hues gana,” Potenza a señala.

Den tur e situacion aki cu Potenza mes a describi como “un viacrucis” el a bisa cu te ainda e tin speransa pa leynan di Aruba lo wordo cumpli “mi no ta considera husto ni logico cu e hendenan aki ta bin condiciona mi pa duna mi loke ta di mi, cu e denuncia aki mi no kier daña ni un hende, mi kier mi placa bek pa mi por cumpra algo otro na Aruba pasobra mi soño ta pa mi pasa mi ultimo dianan na Aruba, mi a perde hopi aña di mi bida wardando pa esaki y mi no kier sigui haci negoshi cu Acqua tampoco, Aruba ta cay bao leynan di Hulanda pero nan no a haci nada legal ni husto cu nos, autoridadnan mester investiga Acqua y Radisson cu e casonan di nos,” el a finalisa.

Potret di area di pool ta di Enlace Arquitectura.