E proyecto ta bayendo segun planificacion y den dos aña ful e proyecto mester ta finalisa
Diamars mainta, Prome Minister Evelyn Wever-Croes, hunto cu Minister Ursell Arends, Minister Glenbert Croes y Minister Rocco Tjon a reuni cu representantenan di Eagle LNG. Eagle LNG a informa Gobierno di Aruba con e proyecto ta bayendo.
Gobierno di su banda ta interesa pa mira con por yuda pa e proyecto bira realidad, segun un comunicado di prensa. Un proyecto cu ta consisti di algun fase. Prome, lo construi un terminal riba e tereno di refineria caminda cu lo bay procesa y traha e aspecto di e gas. Despues lo pone e tuberianan bao tera pa transporta e gas pa WEB.
Prome Minister a expresa cu e proyecto aki pa Gobierno di Aruba ta un prioridad. E momento cu transiciona riba LNG, pa un fase transitorio, e lo baha prijs di combustibel inmediatamente. Prijsnan di awa y coriente lo baha y tambe lo exporta parti di e LNG cu lo genera mas divisa y desaroyo economico pa nos pais. E parti di construccion lo crea tambe cupo di trabao pa nos propio hendenan y despues tambe trabao na e nivel tecnico cu nos hendenan ta bon ekipa pe.
Eagle LNG a indica cu e trabaonan ta bayendo segun planificacion y nan a haci nan peticionnan pa diferente permiso. Y nan ta calcula cu pa memey di e aña aki tur permiso lo keda cla y den dos aña ful e proyecto mester ta finalisa tambe. Eagle LNG a duna di conoce cu nan ta cumpliendo cu e schedule y te hasta por ta nan keda cla mas tempran, cu lo cumbini Aruba tambe.
“Mi ta gradici Minister Glenbert Croes cu ta pone hopi empeño den e proyecto aki como tambe tur departamento cu ta trahando riba esaki. Despues di e reunion aki mi ta hopi mas optimista cu e proyecto aki di berdad ta bira un realidad y lo crea cupo di trabao nobo riba un otro nivel cu nos ta custumbra cune cu lo genera mas desaroyo economico y principalmente ta duna nos un forma con pa reduci prijs di awa y coriente mientras cu na mes momento ta stop di uza e crudo, fuel cu ta asina dañino pa nos medio ambiente. Un proyecto cu lo trece hopi cos bon pa Aruba”, Prome Minister Evelyn Wever-Croes a duna di conoce.
