E islanan di Aruba, Corsou y Sint Maarten a wordo scogi pa National Geographic pa haci e serie Kustwatch Caribisch Gebied unda un ekipo di profesionalnan ta mustra na publico en general e situacionnan mas impresionante y emocionante cu ta sosode den y rond di e area maritimo di e islanan aki.

Dialuna den oranan di anochi na Caribbean Cinemas Aruba, a wordo presenta na prensa y invitadonan e prome episodionan di e di dos temporada di varios mision di Kustwatch Caribisch Gebied den awanan rond di Aruba, Corsou, Boneiro y Sint Maarten cu ta mustra e situacionnan di peliger y angustia cu nan tin cu biba pa por evita contrabanda di droga na lama, trata di persona y casonan di emergencia cu por tuma luga na lama of tera firme cu e ayudo di metal shark, botonan di patruya y helicopter na unda e profesionalnan ta garantisa e siguridad na lama.

Shalick Clement, vocero di Kustwatch Caribisch Gebied den un entrevista pa Bon Dia Aruba, a señala cu esaki ta e di dos temporada na unda e prome a wordo estrena na aña 2020 y cu nan tin aproximadamente tres aña trahando cu e productor Remco Garcia di Goya Productions ken a acerca na nan cu e peticion di traha un documentario tocante Kustwatch pa National Geographic pa lo cual nan tabata interesa di participa den esaki segun el a sigura.

Pa esaki, nan mester a cana henter un proceso pa wak kico tabata e ‘pro’ y ‘contra’ pa motibo cu semper ta saca hopi informacion afo pero nan a haya cu ta importante pa laga mundo y localnan tambe wak con e trabou di nan ta, kico ta e retonan y e peligernan cu nan ta haya pero tambe con nan ta atende cu e personanan.

“Mi ta kere cu e documentario ta duna un bon bista di esey y e ta un exito rotundo, p’esey tambe nos a traha un segundo temporada unda nos a haci e estreno na Aruba mirando cu ta hopi importante pa hende sa kico ta sucede na lama,” Clement a señala.

No ta un secreto cu pa algun biaha Kustwatch, como parti di nan trabou, ta confisca cantidad grandi di droga na lama, pero esaki tambe ta implica riesgo tanto pa e mesun funcionarionan como pa nan famia ora nan ta topa cu hende envolvi den organisacionnan criminal. Pa esaki Clement a sigura cu na momento cu nan a cuminsa cu e grabacion di e serie nan a puntra tur persona individual si nan lo kier sali of no, esnan cu a sali a indica cu nan kier haci’e y cu tin un comunidad chikito tanto na Corsou como na Aruba unda hopi hende sa ken di e mayoria di hende cu ta participa den e serie ta.

“Na momento si cu nos ta haci interceptacionnan hopi peligroso unda tin sospecho cu tin hende cu ta hopi arma, si por mira nan cu cara tapa pa principalmente e personanan mes cu ta sospechoso na e momento ey no haya sa exactamente cua di nos agentenan a haci e trabou, aunke cu criminalnan y sospechosonan ta sospechoso, nos ta atende nan tur como humano pasobra ta hende nos ta y nos ta laga decision den man di hues of Ministerio Publico cu evidencia y investigacion pa sali na cla cu hendenan ta culpabel si of no,” Clement a finalisa.

Ademas, den e serie aki tin e participacion di un persona cu mayoria di personanan na Aruba ta custuma di wak ora ta participa na torneonan internacional di Bowling. Den ocasion aki, Abigail Dammers, ken ta fungi como kwartiermeester na Kustwatch di Aruba, tambe ta protagonista den e serie aki. A menciona na Bon Dia Aruba cu nan a cuminsa filma na aña 2020 na temporada di Covid-19, cual a haci esey bira hopi dificil pa filmacion y te cu aña pasa ainda nan tabata filmando pa e documentario: “tabata un procedura y un filmacion di ongeveer dos aña pa yega na unda nos ta aworaki cu e produccion,” Dammers a bisa.

Dammers tambe a expresa cu esaki tabata un experiencia unico pa su persona mirando cu e ta un deportista profesional debi “cu no ta tur ora den bo trabou un documentario ta wordo traha y lo wordo mira rond di mundo, ora nan a acerca mi pa haci’e mi no tabata kier haci’e, pero despues mi kier wak con e ta bay y e tabata hopi great,” el a finalisa.

E di dos temporada aki cu ta contene ocho episodio di Kustwatch Caribisch Gebied ta sali na Hulanda dia 12 di februari unda riba nan rednan social ta bay publica e link pa esnan interesa por mira e temporada di e trabou aki den cual nan a inclui Aruba, mesun cos cu nan a wordo haci dos aña pasa cu e prome parti na Corsou.