Ayera mainta, e ex-minister Paul Croes a anuncia riba su rednan social cu el a perde su caso den Casacion na Hulanda na unda cu Ministerio Publico a afirma na Bon Dia Aruba cu awor cu e condena a bira definitivo, e trayecto di ehecucion pa sinta su castigo ta cuminsa cana.

Dia 12 di october 2021 Corte Superior a condena Croes na 3 aña di prizon, 8 aña cu no mag di ocupa un funcion publico y no mag di participa den politica. E caso IBIS tabata trata di organisacion criminal manera hues a denomin’e el cual a draai specificamente den e periodo di 30 di october 2013 pa 28 di maart 2017.

Den esaki, a participa e sospechosonan Aparicio, Capriles, Feliciana y Arends. E personanan menciona tabata coordinador, chauffeur, amigo y famia di ex-minister Croes na unda cu HOF a denomina esaki como un fabrica di ontheffing cu a ser maneha for di cocolishi bao e Gabinete Mike Eman 2, loke ta nifica cu esaki ta e di dos minister di partido AVP condena pa corupcion.

Ex minister Croes a bay den casacion contra e sentencia di HOF di dia 12 di october 2021 unda cu ayera 7 di februari Corte Supremo di Hulanda ta ratifica e sentencia di HOF. Awor cu e condena a bira definitivo, e trayecto di ehecucion pa sinta su castigo di 3 aña na KIA ta cuminsa cana, esaki no tin un fecha definitivo ainda pero mester tuma luga lo mas pronto posibel.

E elemento ‘organisacion’ ta e definicion cardinal di e articulo 2:79 di Codigo Penal di Aruba, sin participacion no tin organisacion, segun e articulo aki pa por bisa cu e ta un organisacion criminal tin cu cumpli cu tres criterio: tin un cooperacion mutuo entre e sospechosonan, tin un cierto structura y mester tin un continuacion.

E organisacion aki su structura no mester ta grandi, mester tin minimo dos sospechoso y no necesariamente e sospechosonan den organisacion mester conoce otro, ademas door cu ta un organisacion criminal nan no tin exigencianan pa cumpli ni ta mara na tempo di existencia, y no mester tin deliberacion, e unico intencion di e organisacion ta pa comete actonan criminal.

Articulo 2:79 ta regarda pa proteha e comunidad contra e peliger di e sorto di organisacionnan criminal aki cu ta dirigi specialmente riba colaboracionnan mutuo cu nan mesun dinamismo cu ta un riesgo grandi pa comete e echonan castigabel aki, e articulo 2:79 aki di Codigo Penal di Aruba ta pa evita e existencia di cierto gruponan cu e intencion pa comete actonan criminal.