Ciudadanonan tambe por haci denuncia di caminda den mal estado riba website di DOW

Den conferencia di prensa di prome minister Evelyn Wever-Croes e dia di ayera, a bin dilanti e topico di camindanan na Aruba cu ta den mal estado. El a declara cu “esey no ta un secreto y nos tur a mira kico ta pasando den nos careteranan di asfalt.”

Prome minister a señala cu na prome luga esaki a sucede pa motibo den dos aña largo no tabatin inversion den e careteranan, na momento cu pandemia di Covid-19 a yega na Aruba na aña 2020 tabatin poco fondo pa por a usa pero 2021 y 2022 nan no por a aloca fondonan pa asfalt y cu nan mester a aloca e fondonan ey pa salba bida di hende, pa atende cu e pandemia, atende cu e crisis y cu “tur e placa mester a bay pa yuda tur esnan cu tabatin mester di ayudo, unda e prioridad a bay na e ser humano y no na asfalt durante e añanan aki,” el a bisa.

Cambio climatico tambe ta hunga un papel akinan na Aruba mas y mas grandi manera prome minister a sigura, esaki ta pa motibo cu e temperaturanan di awa y den henter mundo ta aumentando, loke ta pone tambe cu tin mas yobida. Aruba no ta haya hopi molester di horcan, pero yobida si a bira mas frecuente “y ora yobida ta bira frecuente y mas fuerte manera ta pasando na Aruba e tin su impacto riba nos camindanan y nan ciclo di bida ta bira mas cortico unda tin cu mantene of drech’e mas lihe.”

Igualmente, nan a mira cu den ultimo añanan prome cu pandemia falta di fondo pa mantencion a haci cu e camindanan existente caba a cay atras debi cu no tabata haci mantencion preventivo “pasobra mayoria di fondonan a bay pa traha camindanan nobo y no pa drecha e camindanan existente,” prome minister a señala.

Pa loke ta trata cifranan, el a trece dilanti cu desde aña 2017 te cu 2020, den tur añanan aki aproximadamente 5 miyon florin tabata wordo destina pa asfalt cada aña, 70% tabata dirigi pa camindanan nobo y un 30% tabata bay pa mantencion.

Pero na 2021 y 2022 no por aloca ni un fondo unda cu pa e aña nobo aki segun el a sigura, Parlamento di Aruba a caba di pasa e presupuesto caminda cu a aproba entre 1.6 pa 1.7 miyon florin pa cumpli cu esey, mirando e costonan cu a aumenta y nan a percura pa aloca 2 miyon florin cu lo bay pa mantencion di e careteranan.

“Den mi ministerio nos ta buscando di tur forma pa yega na fondonan adicional pa asina por aloca pa drecha e camindanan cu ta den mal estado y te cu ainda nos a logra un fondo adicional di 4 miyon florin, cu lo wordo inverti e aña aki na mantencion di caminda, camindanan nobo y na scolnan pasobra tin algun speelplaats tambe cu mester di atencion urgente,” prome minister a bisa.

E hecho cu camindanan ta den mal estado tin e preocupacion di gobierno manera el a afirma, pero nan ta trahando riba dje pa esey y si tur cos ta bay bon nan tin 2 miyon florin den presupuesto y nan ta buscando e otro 4 miyon adicional cu nan lo wordo presenta na parlamento na momento cu nan lo presenta e presupuesto complementario cu ta bay ta dirigi tambe pa careteranan nobo y pa scolnan.

Banda di esey, prome minister a expresa cu nan ta trahando den un plan pa terminonan largo di kico ta lo cual Aruba tin mester, un inventarisacion pa loke ta trata tur e camindanan y cuanto placa ta bay tin mester pa asina ey drecha of asfalta.

Esaki ta un plan cu nan ta bay dividi’e den 10 aña debi cu mester tin hopi placa pa esey unda nan ta bay cuminsa cu esnan cu DOW tin den un lista di criterionan aplica pa asina ey defini cua ta mas urgente cu otronan, el a bisa cu e plan ta bay keda cla na final di kwartaal aki, kiermen na maart di 2023 pa asina wak kico ta lo cual tin mester pa careteranan y tin cu bay wak con nan ta bay financia e plan aki.

DOW ta e instancia encarga cu obranan publico y nan ta e expertonan den gobierno riba e tereno aki cu ta forma parti di e cartera di prome minister, di esaki tambe el a sigura cu si algun ciudadano kier trece dilanti su keho of denuncia pa algun caminda cu ta den mal estado, por subi riba e website www.dow.aw eynan tin un formulario cu ciudadano por yena y indica unda tin mas problema di asfalt, di camindanan entre otro.

Na momento cu DOW ta ricibi esaki, nan ta haci un evaluacion pa ponel’e den un score y na cierto momento tur denuncia of keho ta wordo poni hunto pa na base di esey tuma e decision di cua di nan tin mas prioridad cu otro.

“No ta solamente DOW ta dicidi, ta cu ciudadanonan tambe por trece nan punto dilanti a traves di e website aki, tambe nos ta ricibi cartanan pidiendo ayudo pa cierto caminda cu ta daña y tur esey ta wordo inventarisa, bo tin mas chens si bo mes haci e keho pa bo caya haya atencion prome y nan ta ponel’e den un score pa cada un di nan haya nan prioridad,” prome minister a finalisa.