Ayera mainta prome minister presidente Evelyn Wever-Croes a realisa un conferencia pa trece dilanti diferente topico, entre nan esun di Rioolwaterzuiveringsinstallatie (RWZI) e cual manera a informa aña pasa ta bay wordo traspasa na un compania priva y cu e trabaonan di mantencion mas grandi a wordo haci caba.
Minister Glenbert Croes y Minister Ursell Arends ta e personanan encarga di esaki pero ainda ta resorta bao di DOW cu ta forma parti di e cartera di prome minister caminda recientemente su persona tabata den parlamento pa trata e presupuesto di DOW na unda prome minister a constata cu tin un falta di informacion.
Di esaki, el a splica cu manera a wordo anuncia caba nan a dicidi di privatisa y traspasa RWZI na Utilities Aruba N.V bao di un entidad nobo cu lo resorta bao di Utilities Aruba N.V.
E plannan ta pa durante e prome kwartaal di e aña aki, mas tardar cu 31 di maart e traspaso por wordo finalisa, minister Croes y Arends ta esnan cu ta negocia den nomber di Gobierno di Aruba pa asina por yega na e traspaso aki.
“Mi mester bisa si cu RWZI no ta asina den mal condicion cu e por manera explota na cualkier momento, pasobra e trabaonan mas grandi di mantencion a wordo haci y ta sigui wordo haci durante e prome kwartaal di e prome aña aki te ora cu traspaso lo tuma luga, tin fondonan den presupuesto pa esaki y aworaki DOW ta concentrando riba e mal molester cu e mal holo ta causando, pa elimina esaki lo mas lihe cu ta posibel” prome minister a indica.
El a enfatisa cu ta bon pa pueblo di Aruba haya sa cu RWZI no ta asina den mal condicion cu e por bay causa dañonan asina serio “pero e mester haya atencion urgente si pa e traspaso y nos ta kere cu den man di un compania estatal of priva e parti di mantencion lo por haya mas y miho atencion cu den man di Gobierno.”
Igualmente redactor di Bon Dia Aruba a solicita na prome minister si ta posibel pa prensa mes por haya un tour den e facilidadnan di RWZI pa asina pueblo mes por wak den ki estado e instalacionnan ta na e momentonan aki pa loke el a sigura cu mester check esey prome y ta informa prensa den dianan dilanti.
