Diahuebs den dia Minister Dangui Oduber conhuntamente cu CEO di Aruba Ports Authority NV (APA), Sr. Marc Figaroa a reuni cu Royal Caribbean Cruiselines (RCCL). Nan dos a forma parti di un delegacion di reino Hulandes.
E delegacion aki a consisti di Consul Generaal di Hulanda na Merca Sra. Emmerink, Secretaris Generaal di Buitenlandse Zaken, Sr. Huijts y tambe directornan di DWH y Sra. Eechoud cu ta directora di DWH.
Na e reunion a hiba tremendo combersacionnan caminda Royal Caribbean Cruiselines a duna pais Aruba credito pa e bunita resultadonan di turismo crucero y a informa na mes momento cu Aruba ta e di dos puerto den Caribe cu miho prestacion.
Nan a recorda con na aña 2021, Minister Oduber hunto cu Sr. Figaroa, durante pleno pandemia a bishita e oficina di Royal Caribbean pa informa nan cu Aruba tin tur protocol cla pa asina habri e fronteranan maritimo. E dia di e reunion ey no tawata tin ningun empleado na nan oficina principal. Tawata solamente e delegacion di Aruba y e team di RCCL. Despues di esaki Aruba a bira e prome pais riba nan itinerario na juni 2021 y awe RCCL ta hopi agradecido pa esaki.
Royal Caribbean a gradici Aruba pa e vision, e curashi y determinacion mustra.
Pa aña 2022 Royal Caribbean a trece 240.000 turista crucero y pa aña 2023 ta proyecta pa trece 310.000 turista crucero. Esaki ta un aumento di casi 30% y ta demostra confianza den e maneho.
Minister Dangui Oduber ta gradici e Consul General Sra. Emmerink, e Secretaris Generaal Sr. Huijts pa forma parti di e delegacion di Reino.
