(NLTimes) – Despues di un investigacion conduci pa RTL Nieuws, a resulta cu cuerpo policial tin miyones di potret den nan base di dato di personanan cu a bay Hulanda for di fuera di Europa. Esakinan ta specificamente personanan cu a bay e pais pa studia, traha, biba of busca asilo den e pais.

Expertonan ta critica esaki bisando cu ta un violacion di privacidad, mientras e cuerpo policial y Ministerio di Husticia ta bisa cu e uso aki ta legitimo y ta ser haci di manera adecua. Mientrastanto, segun RTL Nieuws, e base di dato tin mas o menos 8 miyon potret facial di por lo menos 6.5 miyon persona registra den e departamento . Cuerpo policial ta haci uso di e ptoretnan aki pa CATCH, un sistema cu ta busca sospechosonan via reconocimento facial. Esaki mas tanto ta afecta solicitantenan di asilo y studiantenan di fuer a cu ta bay studia dentro di e Union Europeo.

Sinembargo, e proceso di registra e cara den e base di dato ta ser haci sin cu e persona ta informa di esaki. Esaki ta pa motibo cu personanan cu no ta di e Union Europeo y ta bay Hulanda ta rekeri pa saca un potret di paspoort pa nan permiso di residencia, por ehempel. Na momento di haci esaki, un copia ta automaticamente ser manda na e sistema di cuerpo policial sin cu e persona en cuestion ta ser informa.

E proceso aki no ta algo nobo, mirando cu e sistema aki ta den uso di cuerpo policial for di aña 2016. Por ehempel, e base di dato aki ta usa ora cu e investigadonan tin dificultad pa identifica un sospechoso. Nan ta haci uso di e potretnan colecta pa autoridadnan di inmigracion segun e programa di television. Como resultado di esaki, e base di dato di e caranan di migrantenan potencialmente ilegal ta ser warda tambe.

Expertonan di inmigracion y derechonan di ser humano ta preocupa y ta critica cu e cuerpo policial ta den violacion di ley y no ta respetando e privacidad pa medio di inclui un gran mayoria di e cara di personanan cu ta stranhero, kendenan en principio ta inocente, den e sistema di cuerpo policial.

Ademas, expertonan legal tambe ta kere cu cuerpo policial no ta cumpli cu ley y hasta Dutch Data Protection Authority ta duda e legalidad di e practica aki.

Cuerpo policial ta rechasa e critica aki. Segun e vocero, cuerpo policial mester cumpli cu condicionnan estricto prome cu e imagen facial di e stranheronan por ser mira. Por ehempel, un hues di investigacion mester otorga e perniso na un fiscal cu haci e peticion y ta lidera un investigacion di cuerpo policial di parti di e oficina di fiscal, RTL Nieuws a reporta.

Pa reportero di Ethiopia Anania Sorri Guta, ken a hui for di e pais den aña 2017 y a bay Hulanda buscando asilo, e ta sinti como discriminacion. “E cuerpo policial ta scoge haci uso di e dos basenan di dato aki banda di otro,” el a splica. “Tin un prehuicio pa cu esaki: Stranheronan ta mesun criminal. Normalmente bo ta inocente te ora cu bo ser comproba culpabel, pero pa nso e ta di otro banda. Aunke e tecnologia ta neutral, nos ta ser mira como criminal for di prome instante,” el a expresa na RTL Nieuws.