HIAS Aruba ta un organisacion no gubernamental cu ta ofrece ayudo y proteccion pa personanan refugia y ta promove nan integracion. Un di nan programa mas grandi ta e programa di prevencion y respuesta contra violencia basa riba genero. Relaciona cu e programa aki, Bon Dia Aruba a combersa cu Brian Verschuur, ken ta oficial di masculinidad positivo na HIAS y ta encarga cu un programa enfoca ariba ayudo pa hende homber y e dificultadnan cu nan tambe ta sufri door di violencia di genero y otro problemanan.
E programa ‘Hablemos entre Panas’ (Ban papia entre amigo), ta e programa cu Verschuur ta dirigi na HIAS. El a splica cu el a eligi e nomber ey specificamente ya cu e tabata relaciona na e tema y no tabata mesun agresivo compara cu otro titulonan. “Tin biaha nos ta atende cu temanan hopi personal y incluso dificil y mi no tabata kier a laga e personanan cu ta tuma parti den e programa sinti ataca door di e nomber,” el a remarca.
Verschuur ta conta cu e programa den su forma mas basico ta pa habri un espacio pa hendenan homber por expresa, siña, laga bay y crece como persona. E espacionan aki ta centra den confidencialidad y apertura pa crecemento personal.
E proyecto masculinidad positivo tin un aña caba di existencia y e grupo actual lo ta e di tres grupo cu ta pasa den e proyecto aki.
Verschuur ta enfatisa cu e proyecto a wordo crea pa yena un bashi cu tabatin den loke ta trata atencion na violencia di genero. HIAS tin algun tempo caba atendiendo cu personanan, specificamente hende muhe cu ta sobreviviente di e tipo di problema aki, pero nan a ripara cu nan no tabata haci nada cu e hende homber cu tambe ta pasa door di e problema aki.
“Den e sentido aki nos a sali for di e punto di crea aliadonan den e movemento contra violencia basa riba genero y nos ta brinda tambe un espacio sigur na unda e hombernan por crece, siña y mitiga situacionnan cu lo por resulta den violencia,” Verschuur a agrega.
Pa loke ta trata participacion den e proyecto, el a indica cu na e momentonan aki nan por nota un dificultad pa recluta hende homber pa forma parti di e proyecto aki, pa asisti na e grupo. Esaki, el a señala, hopi biaha tin di haber cu e orario di trabou, salud of interes di e persona.
Den e caso di e hombernan cu a yega di participa y cu ta participando, Verschuur ta subraya cu nan a demostra un apertura y crecemento hopi importante den e proyecto aki. “Nos a crea un fraternidad interesante y mas increibel ainda, nan a demostra conocemento y aplicacion di e teorianan ofreci,” el a bisa.
Esaki ta algo hopi beneficioso, segun Verschuur ta enfatisa, pa motibo cu inicialmente nan a pensa cu nan no tabata por of cu nan no lo logra un acogida asina lihe cu e grupo.
“Esey claro basa ariba e generalisacionnan social cu tin biaha nos sa tin pa hende homber unda tin biaha ta bisa cu no, nan no lo habri nan mes, nan no ta comunica bon etc. Mas bien nos a logra demostra contrario di esey, un bes cu nan a wordo ofreci un espacio sigur pa haci esaki,” el a señala.
Den termino di expectativanan, Verschuur ta spera cu e por agrega por lo menos dos grupo mas pa participa den e programa “Hablemos entre Panas’ e aña ki. “Mi ta spera cu nos por yega cerca di mas hende homber y reclutanan pa nan uni na e movemento importante aki di crecemento personal y lucha contra violencia,” el a finalisa.
