En conexion cu Dia Mundial di Cancer cu ta wordo observa ariba di 4 di februari di cada aña, den e dianan aki Departamento di Salud Publico ta bay comparti informacion importante tocante e malesa aki pa conscientisa comunidad pa hiba un bida mas saludabel.

Departamento di Salud Publico, su seccion di Epidemiologia y Investigacion, ta encarga cu registro di causa di morto di persona nan cu ta muri na Aruba.

Den esaki, nan a splica cu segun datonan colecta for di aña 1999 te cu aña 2021, un total di 3476 (24.6% di tur morto registra na Aruba) persona na Aruba a fayece a causa di un tipo di cancer maligno. Esaki ta nifica cu 1 di cada 4 morto registra na Aruba ta muri a causa di cancer maligno.

Anualmente tin un averahe di 151 persona registra cu a muri door di un tipo di cancer. Desde 2013 nan ta keda wak un aumento den cancer como causa di morto na Aruba.

Caminata organisa entre cuater fundacion pa conscientisa pueblo riba importancia di prevencion

Riba dia mundial di cancer, dia 4 di februari 2023, caminata Sunrise Walk ta wordo organisa pa e pueblo di Aruba na unda e participacion ta completamente gratis.

E caminata ta wordo organisa door di un bunita colaboracion entre 4 fundacion. Esaki ta pa prome biaha den historia di Aruba caminda KWF-Mary Joan foundation Fundacion Contra Cancer di Prostaat y Stichting BOB Aruba ta uni pa conscientisa, motiva y informa pueblo tocante e importancia di prevencion y deteccion na tempo.

Colaboracion ta sumamente importante y nan ta desea di continua pone nan enfoke riba esaki.

Sunrise Walk ta un caminata di 3.5 KM, un ruta facil pa henter famia. E meeting point ta na Bushiribana goldmill ruins. Nan ta pidi tur hende cu kier participa pa t’ey presente 6:15 AM.

Caminata ta start 6:30 AM, lo tin un halfway break cu waterstation pa yena awa. Ta pidi tur participante pa por fabor trece nan boter di awa pa yena y pa cuida e medio ambiente.

“Ban para un rato keto riba e dia aki cu ta dia mundial di cancer. Ban cana hunto y motiva y apoya otro. Uni nos tur ta mas fuerte.”

Door cu dia mundial di cancer ta wordo simbolisa cu e color lila, lo por bin bisti na e color aki. Esaki no ta mandatorio. Pa participa na e caminata no tin cu registra ni tampoco cumpra ticket.

Si ta desea di haci un donacion, esaki ta posibel. Lo tin un donation box presente na e caminata. Fondonan genera e dia aki lo bay haci mas proyectonan di colaboracion entre e 4 fundacion posibel y asina yuda nan continua conscientisa mas riba prevencion, locual cu ta sumamente necesario pa e generacion presente y tambe pa e futuro generacion.

Banda di nos Sunrise caminata y nos programanan di tur dia, nos (e fundacionan: KWF-Mary Joan foundation Fundacion Contra Cancer di Prostaat y Stichting BOB Aruba) tin un serie informativo di podcast yama: “ Mi no a scoge pe”. Den cada edicion di e podcast serie aki nos lo combersa cu diferente dokternan di cas – specialistanan y testimonionan. Cada luna nos ta intercambia otro topico relaciona cu cancer y lo duna tips tocante locual cada persona mes tambe lo por haci na cas. Tur esaki den relacion cu prevencion.