Dia 4 di februari ta dia Mundial di Cancer. E iniciativa di celebra dia Mundial di Cancer ta lidera pa Union for International Cancer Control (UICC). E meta di e iniciativa aki ta pa crea conscientisacion mundialmente, mehora educacion y pa traha hunto pa preveni miyones di mortonan pa causa di cancer y brinda aceso na cuido y tratamentonan contra cancer pa tur hende.
E iniciativa di dia Mundial di Cancer a wordo estableci na aña 2000 y durante e ultimo añanan esaki a crece den un movemento positivo pa tur rond mundo pa asina uni y enfrenta un di e obstaculonan mas grandi den historia.
Tur aña rond mundo diferente actividadnan ta wordo organisa y a traves di esakinan ta uni comunidad-, organisacion- y personanan cu ta brinda nan apoyo y ta yuda core e voz pa conscientisacion.
E aña aki e tema pa e dia Mundial di Cancer ta ‘Close the Care Gap’ (Cera e Buraco den Cuido) y e campaña aki ta enfoca ariba no solamente e celebracion di un solo dia, pero e ta mas un bien un campaña di tres aña cu lo enfatisa ariba creacion di mas oportunidad pa crea conscientisacion global y impacto mas grandi rond mundo.
E prome aña di e campaña, 2022, tabata concentra ariba e comprendemento y reconocemento di desigualdad ora ta trata cuido y tratamento di cancer rond mundo.
Aña 2023 ta enfoca ariba union y tuma accion. E meta pa uni cu persona cu mesun pensamento, mesun obhetivo y celebra progreso rond mundo den diferente forma.
Den ultimo aña di e campaña, aña 2024, lo traha pa trece atencion ariba un nivel mas halto, lo lucha pa yega na e lidernan di rond mundo y asina pusha pa cambionan a largo plaso.
En conexion cu e dia special aki e fundacionnan na Aruba, KWF, Mary Joan Foundation, Fundacion contra Cancer di Prostaat y Stichting BOB Aruba a uni pa conscientisa, informa y motiva henter e comunidad di Aruba tocante e importancia di prevencion y deteccion trempan.
Ariba dia Mundial di Cancer, 4 di februari, lo tin caminata, Sunrise Walk. E caminata aki lo cuminsa pa 6:30 di mainta y lo ta saliendo for di Bushiribana Gold Mill Ruins. E caminata aki ta completamente y ta pidi tur participante pa bisti na color Lila, e color cu ta simbolisa dia Mundial di Cancer.
