InselAir Aruba atrobe ta den un situacion di problema nobo awor cu Aruba Tourism Authority (ATA) a pone beslag riba nan cuentanan. Banda di esaki e situacion cu mayoria di e trahadonan ainda no a keda resolvi.
E suma cu InselAir ta debe ATA no ta conoci. E aerolinea tin problema cu e cash flow serio locual a bira mas pio momento cu autoridadnan a ground e flota di avionnan na Aruba. E compania tin un debe di belasting cu a resulta cu e departamento di belasting a pone beslag riba nan cuentanan luna pasa. Findishi di e inventario di InselAir Aruba ya tabata planea pero na ultimo momento e partidonan a yega na un areglo nobo. Siman pasa e departamento a kita e beslag. Pero ni un siman a pasa y un otro instancia di gobierno a pone beslag, den e caso aki ATA.
Mayoria di e 93 trahadonan di InselAir na Aruba tambe a cuminsa para trabou momento cu nan salario no a drenta. Te ainda e situacion aki no ta influencia e schedule di bula (cu avionnan di Corsou), segun Stephan van Spaandonk, cu ta e Chief Maintance Officer di InselAir na Aruba. “Pero nos no por descarta cu esaki lo pasa si e welga lo intensiva”, asina e ta bisa Bon Dia Aruba. Gerencia tin contacto diario cu e grupo. Tin empleadonan cu si a cobra, esta personal na oficina y cu no ta bula. Sinembargo pilotonan y flight attendant nan no a cobra luna di februari ainda.
InselAir International (e compania na Corsou) tin un acuerdo cu gobierno di Corsou cu a fia e aerolinea 33 miyon florin. E compania di aviacion no ta ricibi e suma aki completo pero den diferente transaccion.
