Ayera riba nan pagina di Facebook, Arubus NV a anuncia un interupcion di servicio pa awe dialuna dia 30 di januari, di 11am pa 3pm. E orario y fecha aki ta coincidi cu bishita di su mahestad Rey Willem-Alexander, Reina Maxima y Prinses Amalia.

“Gerencia di Arubus NV tin e deber di informa cu nos servicio di transporte lo por sufri retraso y /of interupcion Dialuna 30 di januari 2023 di 11or di mainta te cu 3or di atardi. Esaki en conexion cu un manifestacion cu lo tuma lugar,” Arubus a indica. Alabes a pidi disculpa pa cualkier inconveniencia cu por causa na e usuarionan di Arubus, “cual ta totalmente fuera di nos alcance.”

“Mañan merdia nos ta bay plat. No ta acepta e carta di Minister Ursell Arends y no sa ainda ni con tampoco unda lo protesta, esey ta dicidi mañan”, un shopsteward di SEPPA na Arubus, no identifica personalmente, a bisa portal online 24ora. No a duna mas informacion tocante e protesta, si ta bay tin welga, maske si a indica cu ta bay tin un reunion cu e sindicato.

E manifestacion aki ta en conexion cu un bonus di 750 florin cu trahadornan di Arubus a ricibi na december riba nan salario. Sinembargo, awo gobierno a manda un carta den cual ta pidi e trahadornan pa duna e placa aki back, maske e trahadornan a expresa den medionan di comunicacion local cu lo ta dificil pa duna e placa back mirando cu hopi di e trahadornan a gasta e placa caba.

Den un carta dirigi na Magaly Britto, presidente di sindicato SEPPA, minister di Transporte, Ursell Arends a indica cu a ricibi un carta di e sindicato indicando cu e trahadornan ta rechasa e proposicion pa un compensacion di Afl. 3,350 total pa persona den cuadro di e tema di structura salarial.

Manera Bon Dia Aruba a publica, ya caba na december ultimo trahadornan di Arubus a bay den accion, debi cu nan kier haya solucion pa e salarionan nobo cu compania kier implementa y cu segun e trahadonan mes a señala, esey ta husto pa e compania pero no pa e trahadonan. Den e schalering cu Arubus ta presenta, 40 hende solamente a bay dilanti den nan salario di e cual esun cu sindicato SEPPA a propone incluyendo esun di pension, ta duna un total di 70 hende cu tin 10 aña of mas wardando pa un aumento di salario, segun Patrick Dake, trahado di Arubus a conta. E tempo ey, minister Ursell Arends a sigura cu nan sa cu nan tin basta tempo caba cu hopi preocupacion cu ta reina cu e trahadonan di Arubus.

Den su carta, minister Arends “ta lamenta cu e esfuerso di mediacion di parti di gobierno como accionista, como tambe e esfuerso di intermediacion di parti di Mediador di Gobierno no a duna resultado,” y pues el a bisa cu su intermediacion den e asunto ta termina eynan. “Hunta di Comisario y/of Gerencia lo yega na un areglo cu trahadornan pa por entrega back suma di 750 florin deposita na december 2022.” El a bisa cu den cuadro di principionan di Good Corporate Governance, gobierno lo no instrui, exigi ni obliga ningun Hunta di Comisario pa revoca un of otro decision legitimo cu nan tuma den cuadro di nan autoridad.

Pues e decision di minister di Transporte no a cay bon cerca e trahadornan di Arubus, y awo a dicidi di tene un accion riba un dia cu nan lo spera lo pone presion adicional riba gobierno, mirando cu famia real ta di bishita. Detayenan di e manifestacion sinembargo ainda no ta conoci.