Ayera diadomingo a tuma luga e di dos parada pa Carnaval 69, parada di blaas na San Nicolas. Den un tempo di poco awasero, e parada di blaas a sali pa 2or di atardi for di Joe Laveist Ballpark.
Tabatin en total 4 grupo cu a participa den e parada, incluyendo Massive Brassbrand cu a habri e parada, sigui pa TOB Kids Carnival Group, grupo number dos tabata Don Flip Carnival Group y parada a cera cu Champagne Kids Carnival Group.
Massive Brassband tabata e prome grupo y un biaha mas e grupo di Massive Brassband Kids tabata central y ta e grupo cu a habri parada compaña pa Massive Brassband adulto. Massive Brassband Kids tabatin 33 mucha riba caminda tocando pa habri e parada.
Manera ta conoci Massive Brassband tin hopi aña participando den carnaval y pa basta aña caba Massive Brassband Kids ta habri parada di blaas na San Nicolas, como tambe parada di mucha na San Nicolas.
Scol di Asamabeho ta activo durante full aña y ta duna les na esnan interesa pa siña toca e ritmo di asambeho. Pa informacion por tuma contacto cu Roderich Lopez, fundador di Scol di Asambeho na 5941297 of a traves di nan pagina di Facebook.
Grupo di carnaval number un den parada di blaas tabata TOB Kids Carnival Group cu tabatin e tema Pop It. TOB Kids tabatin alrededor di 450 participante riba caminda y despues di dos aña di descanso, e fantasianan di blaas tabata tremendo y a luci ariba e careteranan di Aruba.
Grupo number 2 tabata Don Flip Carnival Group y a bay cu e tema ‘Tik Tok Starz’. E muchanan di Don Flip Carnival Group a demostra nan alegria ariba caminda y a luci tambe e diferente fantasianan di blaas bunita durante parada.
E ultimo grupo cu a participa den parada di blaas tabata Champagne Kids Carnival Group, y e grupo aki a bin cu e tema ‘Encanto’. Champagne Kids Carnival Group a luci den parada y tabatin cuater diferente mini carosa completamente decora na blaas y enfoca ariba diferente aspecto di e tema, manera e personahenan di e pelicula.
