Dos siman di anticipacion ta alcansa su climax awe cu yegada di famia real di Reino Hulandes, Rey Willem-Alexander, Reina Maxima y prinses Amalia. Emocion pa e tour di Caribe di famia real ta particularmente halto ya cu ta prome biaha cu e parti Caribense di Reino ta cera conoci cu e prinses desde cu el a cumpli 18 aña di edad dia 7 di december ultimo.
E momento historico aki ta cuminsa pa 10:30 cu yegada di famia real na aeropuerto Reina Beatrix. Nan ta bay tour nos isla cu un agenda hopi preta yen di actividad. Por compronde cu e famia real mes personalmente a solicita pa e bishita permiti nan experimenta e isla pa nan mes, y esaki ta refleha den e aspecto “hands-on” di e bishita.
Pueblo ta invita pa saluda e famia real na diferente punto durante e bishita, y ta spera un gran presencia di nos pueblo.
For di nan yegada awe, Rey, Reina y Prinses ta bay parke Whilhelimina pa algun actividad, pa cual a invita muchanan di scol. Tambe ta bay tin un tin e militarnan cu lo haci un ‘erewacht’ den e parke, y despues nan ta bay na e cas ceremonial di Gobernador pa un encuentro. Unabes cu nan termina na gobernador, nan lo cana bay Parlamento caminda cu tambe lo tin un encuentro y despues nan ta sigui pa Bestuurskantoor
pa un reunion cu Conseho di Minister di Aruba. Na caminda, lo tin diferente presentacion di arte, canto y di baile pa e Famia Real experiencia Aruba su cultura. Henter pueblo di Aruba ta cordialmente invita pa ta presente riba e ruta pa duna Rey Willem Alexander, Reina Maxima, y Prinses Amalia bon bini.
Awe tardi, lo bay tin un actividad na San Nicolas caminda cu nan lo bishita Filomena College y mira un exposicion di Boy Ecury. Despues nan lo haci un recorido den e cayanan di San Nicolas pa mira algun di e pinturanan bunita cu tin riba e murayanan. Un bes mas, henter comunidad ta bon bin pa ta presente y pa saluda nan. Despues lo tin un actividad prepara pa nan dilanti di Nicolaas Store pa e famia Real.
Diamars dia 31 di januari, lo bay tin algun actividad mas chikito, unda cu pueblo un bes mas ta bon bini. Den oranan di mainta Prinses Amalia ta bishita Aruba Aloe Balm y despues e famia Real nan lo bishita Universidad di Aruba caminda lo tin un debate cu hobennan y combersacionnan riba diferente tema. Despues Rey Willem Alexander y Pinses Amalia lo bay Frans Figaroa, como cu Reina Maxima tin otro sitio pa atende. Diamars atardi, dia 31 lo bay tin un tremendo Bon Bini Festival y diferente actividad riba Plaza Padu dedica na e Famia Real cu ta di bishita. E anochi lo termina den Fort Zoutman pa nan experiencia e Bon Bini Festival cu nos ta custuma di dje. Asina lo percura pa Rey Willem Alexander, Reina Maxima, y Prinses Amalia experiencia Aruba y yega cerca di pueblo manera cu nan deseo ta.
Diaranson mainta no lo tin tempo pa ningun actividad, pues lo dispidi di nan y pa nan sigui pa Corsou.
Premier Wever – Croes den nomber di Gobierno di Aruba ta invita henter comunidad pa sali y mustra Rey Willem Alexander, Reina Maxima, y Prinses Amalia un caluroso bon bini y ohala nan tur keda encanta cu Aruba.
Ultimo biaha cu Rey Willem-Alexander y Reina Maxima a bishita Aruba tabata na 2015 pa e evento SailAruba, celebrando 200 aña di Reino Hulandes y 350 aña di Korps Mariniers.
