Venezuela: Produccion di petroleo por cay severamente na 2017

MarketWatch a publica un articulo extenso riba situacion di petroleo Venezolano, di Myra Sae Fong, citando un cantidad di fuente conoci den e ramo aki. Seguidamente un resumen di esaki. 

“Venezuela su produccion di petroleo por mustra un reduccion significante den e lunanan nos dilanti, y esey lo no tin nada di haci cu e peticion haci pa corta produccion, como miembro di OPEC. Como e pais cu e reservanan mas grandi na mundo di petroleo, Venezuela tin e potencial di influencia e mercado petrolero grandemente.”

“Mientras cu Venezuela tin tonelada di petroleo den su subsuelo, desafortunadamente pa nan, nan tin un di e costonan mas halto pa saca un bari y procesa esaki, entre e miembronan di e Organisacion di Pais Exportador di Petrleo (OPEC),” asina Tyler Richey, co-editor di e ‘Sevens Report’ ta bisa.

Venezuela su reservanan proba ta calcula na 300.9 biyon bari na fin di 2015, di acuerdo cu BP su Statistical Revue of World Energy, juni 2016. Esey ta mas cu e 266.6 biyon di Saudi Arabia y sigur hopi mas cu e 55 biyon di Merca. Pero ta costa Venezuela como US$27,62 pa produci un bari di crudo y gas natural na 2016, di acuerdo cu un articulo publica pa WSJ News Graphics aña pasa, cu ta cita dato di Rystad Energy UCube. Esey ta rank e como number cuatro den termino di productor mayor cu ta paga mas pa nan saca nan producto for di subsuelo y ganashi a keda corta severamente den ultimo añanan. Prijs pa benchmark mundial Brent ta comercialisa actualmente na US$ 55 pa bari, mas o menos mita di e prijs di juni 2014.

Igualmente West Texas Intermediate, e benchmark Mericano, ta na un par di dollar menos pa bari, na US$ 53, compara cu US$ 106 pa bari na 2014. Tempo cu prijs di petroleo tabata na US$ 100, Venezuela por a logra, pero awor cu prijs asina abao, produccion a cay,” Richey ta bisa. “Nan tin awor un problema serio di presupuesto.” Manera CNN a caba di raporta siman pasa, Venezuela tin solamente US$10.5 biyon na reserva di divisa pa resto di aña, y cu US$ 7,2 biyon di debe pa paga e aña aki. E cifranan ey ta sugeri cu e pais por keda sin cash pronto.

“Den produccion di petroleo, Venezuela ta keto bay rendabel”, Richey ta bisa. “Pero, nan a produci presupuesto hopi agresivo basa riba prijs di riba US$ 100 pa bari. Awor, cu entrada na mita di loke e tabata, nan ta profundamente den cora.” Den un rapport di januari 2017 di Fitch Ratings, nan ta bisa cu PDVSA ta enfrentando un aña di hopi reto y cu un default riba nan debenan ta “probabel”, debi na un incremento modera di prijs di crudo, produccion mas abao y un posicion debil di likides. E problema grandi cu a señala ta, cu durante e ultimo añanan no a probecha e prestamonan di China y Rusia pa reinverti den pos di petroleo nobo, segun James Williams, economista specialisa den energia na WTRG Economics.

“Nan politica a core cu mayoria di e inversionistanan den petroleo y gas for di e pais”, e ta bisa. Tambe Williams ta bisa cu mayoria di e companianan di servicio no kier haci negoshi cu Venezuela, o a corta nan operacion te na un minimo, manera Schlumberger y Halliburton. Aña pasa caba, Schlumberger a bisa cu nan ta baha nan actividad, pa motibo di pago insuficiente ricibi den ultimo temponan. Venezuela su produccion a cay como un miyon bari pa dia desde cu Chavez a asumi poder, Williams ta agrega. “E motibo primordial ta e fayo di no inverti suficiente di e ganashinan den bora pos nobo”, e ta bisa. “Falta di placa y falta di mehoracion di infrastructura a conduci na reduccion di produccion. Den otro palabra, tabatin un fayo na cada nivel pa sustenta e produccion Venezolano.”

“Tumando tur esaki hunto, e produccion nacional ta parce di ta continua den deterioro,” Williams a finalisa.E grafico di Trading Economics ta mustra cu Venezuela su produccion tabata calcula na 2.25 miyon bari pa dia na januari 2017. Sin embargo, esaki ainda ta riba e limite di 1.972 miyon bari pa dia cu ta e limite acorda cu OPEC pa inicio di e aña aki. Pero solamente pa mantene e produccion actual, segun Williams mester conta cu por lo menos 70 instalacion (oil rigs) operando. Esey, segun estadistica di WTRG Economics, no ta e caso na tur momento.