Cu hopi positivismo Aruba Ports Authority N.V. (APA) ta informa cu aña 2022 a cera cu logro y recuperacion. E cantidad di turista cu a yega nos isla por medio di crucero a conoce un crecemento satisfactorio, den comparacion cu e aña prome.

Turismo crucero a cera aña cu un total di 610,474 pasahero, cu ta traduci den un 73% di recuperacion den comparacion cu aña 2019, representando 306 calls cu ta un 94% compara cu aña 2019.

A pesar cu aña a cera cu cifra sumamente positivo, no por kita afo cu e prome kwartaal tabatin su retonan pa motibo di Covid y un poco despues e variante Omicron. Yegada di e virus y su variante a causa basta cancelacion pero tambe a causa un impacto den e grado di ocupacion abordo durante a prome dos lunanan di aña.

Miho cu 2019
 Pa Aruba Ports Authority N.V., e luna di juni y november 2022 tabata e miho lunanan pa e aña mirando cu si compara e cifranan di e mesun lunanan, e ta supera e cifranan di aña 2019. CEO di Aruba Ports Authority (APA), Marc Figaroa, tabatin como meta pa yega e cifranan di aña 2019 cu tabata e aña record pa turismo crucero. P’e prome 6 lunanan (te cu juni 2022), APA a yama bon bini na 263,472 pasahero di barco crucero.

Varios crucero a yega Aruba pa prome biaha
Na e logronan pa aña 2022 por agrega cu Aruba Ports Authority N.V. a yama bonbini na por lo menos 12 crucero cu a bishita Aruba pa prome biaha. Un di nan ta Oasis Class di Royal Caribbean. Ta hopi preparacion a tuma luga na waf p’e yegada di e barco grandi di e cadena Royal Caribbean. E proyecto aki a encera hacimento di limpiesa di e canal di e ultimo kade di APA, na un distancia di 100 meter bin abou di e ultimo pier. E proyecto tabata un joint venture di e compania local y internacional. Nan a ehecuta e trabou y a haci limpiesa di mas of menos binti mil meter cubico.

Inversion den e proyecto aki tabata di mas o menos 1.6 miyon florin y a bini fo’i fondo di APA mes. A haci esaki, unda ta mira e return on investment cu e binmento di Oasis-Class y den futuro mas di e mega cruceronan aki pa nos isla. Oasis-Class ta e crucero mas largo y mas grandi di mundo! Ta un crucero cu ta capas di carga 5400 pasahero den camber di ocupacion dobel of te cu un ocupacion maximo di 6296 pasahero. E ta midi 360 meter di largura, 72 meter di haltura, ta bay 22.55 meter hundo y tin un total di 16 piso. E ta nabega riba un velocidad di 22.6 knots, o sea 41.9 km pa ora.

Den luna di october 2022 APA a yama bonbini na Norwegian Prima, un di e cruceronan mas nobo riba mercado n’e momentonan aki. Marc Figaroa a subi e barco pa personalmente yama capitan Gustavsen, su tripulacion y e mas di 2.100 pasaheronan bonbini na Aruba. Yegada di e crucero nobo Norwegian Prima tabata un balor agrega pa nos economia y pa nos turismo. Ta un desaroyo positivo cu por mira cu hopi satisfaccion.

E crucero Norwegian Prima ta carga un maximo di 3215 pasahero. E tin 20 piso, 1646 camber, 16 lift y ta midi 299 meter di largura. Ta yam’e e “Prima Class” di Norwegian Cruise Line y ta prome den seis crucero cu a ordena na februari 2017 na Italia, di cual e prome a keda cla y a cuminsa nabega na augustus ultimo.

Den luna di november APA. a yama “Celebrity Beyond” bonbini pa prome biaha. Celebrity Beyond ta un di e cruceronan mas nobo di Celebrity Cruises, cu a join e flota di Celebrity na april di 2022. Pa APA, Celebrity Beyond ta un barco masha moderno y a trece casi 2500 pasahero abordo.

Durante e ultimo diabierna di aña 2022, Aruba Ports Authority N.V. a ricibi e Azamara Onward. E crucero aki ta un crucero completamente renoba cu a drenta den e flota di Azamara den e di dos kwartaal di 2022.

E aña ‘ki: Turismo crucero lo sigui crece!
Di acuerdo cu e proyeccionnan, mara na negosacionnan haci y preparacionnan interno na waf, cu e luna aki a yama bonbini, pa prome bez, na e crucero Ritz Carlton – Evrima. Ta trata di un crucero luhoso di apenas 149 suite, cu ta acomoda 298 pasahero. Ta algun luna pasa e crucero a cuminsa nabega, como e prome den tres cu e compania Marriott International a adkiri.

Ya por indica caba cu ta bay tin mas crucero nobo cu lo bishita nos isla pa prome biaha e aña aki. Entre nan nos lo tin na luna di mei y juni, cu APA lo celebra yegada pa prome bez di e crucero Celebration y Mardi Gras respectivamente. Ambos ta opera pa Carnival Cruise Line.

Celebration tin un capacidad di 5347 pasahero a base di ocupacion dobel y tin un largura di 344 meter y a haci su maiden voyage na November 2022. A lansa Mardi Gras na fin di juli 2021, ta midi 340 meter di largura y tin un capacidad pa carga 6500 pasahero mas 2000 tripulante. Mardi Gras ta pertenece na e categoria “Excellence Class” y ta e crucero di mas grandi den e famia di Carnival Cruise Line, na mundo y mester remarca cu e barco aki ta opera riba LNG.

Ta bon pa menciona cu e tipo di cruceronan aki, considera como “mega cruises” ta yega Aruba cu un cantidad hopi grandi di pasahero abordo, banda di tripulacion. Nan ta subi tera y haci uzo di nos facilidadnan di tour, ta come na Aruba y ta bishita nos atraccionnan. Sin duda ta duna un aporte substancial na nos economia. Y pa por a logra atrae e tipo di cruceronan asina, tabata necesario inverti den e facilidadnan portuario, pa acomoda e crucero sin problema den waf.

“Hunto nos ta logra mas”
CEO di Aruba Ports Authority, Marc Figaroa, a sigura cu e aña aki ta pinta bon. “Nos a traha duro durante e pandemia, a keda den hopi bon communicacion cu companianan di crucero, a negocia condicionnan nobo y a convence nan cu Aruba tin hopi di ofrece. Esaki a sosode hunto cu demas partnernan den turismo, manera Aruba Tourism Authority y Ministerio di Turismo. Hunto nos ta logra mas”, di acuerdo cu e CEO di waf. El a enfatisa cu ultimamente a recluta mas empleado na APA pa por brinda e nivel di servicio desea, mara na mas crucero y mas pasahero. A reenforsa nan ekipo legal, comercial y digital di e compania, den un esfuerso pa hiba APA na e siguiente nivel di desaroyo, innovacion y crecemento.

“Pa e aña aki, ta premira mas recuperacion y cu un chens hasta pa crecemento den comparacion cu aña 2019. Ta bon pa realisa si, cu contrario na otro industrianan, cu den esun di crucero, locual bo negocia awe bo ta mira resultado dos aña despues. Ta tuma mas tempo pa e companianan aloca un crucero pa bo ruta, pa promov’e, bend’e y finalmente ehecuta e proyecto. P’esey nos ta premira cu tur e simianan cu a planta durante y despues di pandemia, lo cuminsa demostra nan frutonan awo”, di acuerdo cu Marc Figaroa.